Góðan daginn,
Í fréttabréfinu er fjallað um:
- Mikið í pípunum hjá Lucinity eftir snarpa stefnubreytingu
- Bestu vinnustofurnar eru haldnar án glærukynninga
- Teya telur útlán vera eitt stærsta tækifærið til vaxtar
- Forstjóri Mowi: „Það er verk að vinna á Íslandi“
- Skuldlaus Eyrir með nýja stefnu í fjárfestingum
- Fjárfesting í BBA//Fjeldco brjóti blað í sögu framtaksfjárfestinga
- Nýr fítus á forsíðu
„Við vorum að einhverju leyti ekki búin undir þetta háa verðmat“
Fréttir af víðtækum uppsögnum hjá stórum alþjóðlegum fjármálastofnunum bera vitni um það hvernig gervigreind er nú þegar byrjuð að umbylta bakenda og regluvörslu í geiranum. Lausnin sem íslenska tæknifyrirtækið Lucinity þróar eftir stefnubreytingu á síðasta ári rímar vel við þessa þróun.
„Fjármálafyrirtæki eru þegar byrjuð að prófa sig áfram með lausnir á borð við okkar og við teljum að þau muni auka þá notkun hratt á næstu misserum til að dragast ekki aftur úr,“ segir Daníel Pálmason, forstjóri Lucinity.
Fyrirtækið hafði um nokkurt skeið átt í erfiðleikum með að fjármagna sig til lengri tíma, en þessir erfiðleikar stöfuðu meðal annars af því hversu miklar væntingar voru bundnar við hraðan vöxt í kjölfar fjármögnunarlotu árið 2022.
Það náðist að höggva á hnútinn með fjárhagslegri endurskipulagningu síðasta haust og eftir þýðingarmikinn samning við hugbúnaðarrisann Oracle hefur Lucinity gott svigrúm til að fylgja áformunum eftir.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Teya telur útlán vera eitt stærsta tækifærið til vaxtar
Eitt helsta vaxtartækifærið í rekstri Teya, sem er einn stærsti þjónustuveitandinn á sviði greiðslumiðlunar hér á landi, felst í lánveitingum að mati stjórnenda fyrirtækisins.
Mikil samkeppni ríkir nú í veitingu neytendalána. Síminn hefur byggt upp fjögurra milljarða króna útlánasafn á síðustu árum og Elko, sem er í eigu smásölufélagsins Festi, kom nýlega inn á markaðinn.
Bestu vinnustofurnar eru haldnar án glærukynninga
Það er ekki sjálfgefið að vinnustofa skili tilætluðum árangri. Hættan er sú að allir séu of kurteisir og sammála, enginn segi það sem segja þarf og að endingu hafi þátttakendur mismunandi skilning á því hvað var ákveðið.
Björgvin Inga Ólafsson, meðeiganda hjá Deloitte, fer skilmerkilega yfir það í aðsendri grein hvernig alvöru vinnustofa eigi að vera.
Forstjóri Mowi segir vill hærra verð fyrir íslenskan lax
Forstjóri Mowi, sem er stærsti eigandi Arctic Fish á Vestfjörðum, segir norska eldisrisann ekki ánægðan með verðin sem fást fyrir íslenskan lax og segir verk að vinna á því sviði. Samkvæmt tölum Mowi, sem er stærsti framleiðandin á eldislaxi, hefur meðalverð á laxi frá Íslandi verið um 8 prósentum lægra en í Noregi síðustu fjögur ár.
Ritstjóri Hluthafans tók að sér það verkefni að stýra hlaðvarpsþáttum um sjókvíaeldi á vegum Samtaka fyrirtækja í sjávarútvegi, SFS. Bláir akrar heita þættirnir og einn af viðmælendunum var Linda Gunnlaugsdóttir, sölustjóri hjá Arnarlaxi á Vestfjörðum.
Að sögn Lindu er hægt að gera betur í því að markaðssetja íslenska laxinn sem íslenskan, rétt eins og Færeyingar, Norðmenn og Skotar hafa gert. Það sem vantar er sameiginlegt átak fyrirtækja, og gildir þá einu hvort um ræðir landeldi eða sjókvíaeldi. Því er ekki til að dreifa eins og staðan er í dag.
Töluverður ávinningur væri fólginn í því að komast nær Norðmönnum í verðum. Verðmæti útflutnings á fiskeldisafurðum námu 53 milljörðum króna í fyrra og landeldið á eftir að koma inn af fullum þunga.
Fleiri fréttir frá síðustu dögum
Fjárfestingafélagið Eyrir, sem áður hét Eyrir Invest, vill fjárfesta í fyrirtækjum sem hafa starfsemi í löndum þar sem lög, regluverk og stjórnarhættir eru með ámóta sniði og á Íslandi. Meginfókus er á fyrirtæki með höfuðstöðvar á Norðurlöndum, Hollandi eða Sviss samkvæmt nýrri fjárfestingastefnu.
Ráðgjafi AGDR, sænska félagsins sem fjárfesti í lögmannastofunni BBA//Fjeldco, segir að þetta sé í fyrsta sinn sem framtakssjóður eignast hlut í lögmannastofu sem er leiðandi á sínu starfsvæði.
Nýr fítus
Hluthafinn er fréttabréf miklu fremur en fréttavefur. Það er helsti snertiflöturinn við lesendur. Tíðni frétta á vefnum hefur ekki verið þannig að það borgi sig að líta þar inn mjög reglulega, en á móti reynum við að senda lesendum athyglisvert fréttabréf í hverri viku.
Nú höfum við tekið lítið skref í átt að því að gera vefinn ögn „dýnamískari“. Efst á forsíðunni má líta fréttaveitu sem birtir hlekki á innlendar viðskiptafréttir.
Hugmyndin var að smíða snjalla, stílhreina og hnitmiðaða fréttaveitu, en hún er enn á tilraunastigi og verður betrumbætt á næstunni. Svo kann að vera meira í pípunum en við gætum þess að lofa ekki upp í ermina að sinni.
