Með fjárhagslegri endurskipulagningu síðasta haust og stórum samningi við bandaríska tæknirisann Oracle náði hugbúnaðarfyrirtækið Lucinity að skapa sér svigrúm til þróunar á nýrri lausn sem tekur mið af því hvernig framþróun gervigreindar er byrjuð að umbylta bakenda og regluvörslu í bönkum.
„Við erum með mjög margt í pípunum og komin langt í viðræðum við nokkra aðila um þessa nýju lausn, “ segir Daníel Pálmason, forstjóri Lucinity, í viðtali við Hluthafann.
„Við erum mjög bjartsýn á að sú þekking sem við höfum á þessum geira, ásamt sérfræðiþekkingu í þróun á þessari tegund gervigreindar, muni fleyta okkur langt á næstu tveimur árum. Fjármálafyrirtæki eru þegar byrjuð að prófa sig áfram með lausnir á borð við okkar og við teljum að þau muni auka þá notkun hratt á næstu misserum til að dragast ekki aftur úr.“
Þegar Guðmundur Kristjánsson stofnaði Lucinity árið 2018 eftir að hafa unnið sem stjórnandi hjá fjármálarisanum Citigroup var hugmyndin sú að búa til málavinnslu- og rannsóknarkerfi fyrir peningaþvættisvarnir í bönkum, sem gæti tekið við og greitt úr öllum tegundum mála sem berast úr öðrum undirliggjandi eftirlitskerfum.
