Megnið af þeim félögum sem eru með veltu eða eignir yfir 500 milljónum króna hefur skilað ársreikningi fyrir síðasta ár og ákvað Hluthafinn því að taka saman hvaða 25 félög væru í arðbærasta rekstrinum. Í því skyni var rekstrarhagnaður settur í samhengi við tekjur.
Það þurfti að grisja listann nokkuð vel og niðurstaðan var blanda af fyrirtækjum í hugverkageiranum, innviðarekstri og ferðaþjónustu ásamt öðrum greinum. Og það er dálítið merkilegt hvernig arðbærasta fyrirtæki landsins var stofnað af eins léttvægu tilefni og hugsast getur, eins og rifjað er upp í fréttinni.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Nýr þáttur af Uppgjörinu fór í loftið en þar var rætt við Ellert Hlöðversson, fjármálastjóra Íslandsbanka, um bankaskattinn, samkeppnishæfni bankanna og af hverju vaxtamunur á Íslandi er hærri en á Norðurlöndunum.
Hér er svo stutt samantekt um það sem þáttarstjórnendur tóku fyrir:
- Hvernig er Íslandsbanki að hugsa um SRT-gjörninga, sem hafa farið eins og eldur um sinu í Evrópu?
- Er fjármálaráðherra að gleyma því að hækkun bankaskatts rýrir arðgreiðslugetu Landsbankans?
- Hvað kostar verkfall flugvirkja Icelandair?
- Innlán heimila vaxa statt og stöðugt og tilhneigingin er sú að telja að þetta fjármagn geti leitað inn á hlutabréfamarkaðinn þegar vextir lækka. En Stefnir hefur bent á það að stór hluti af aukningu innlána hérlendis hafi runnið til eldri aldurshópa sem hafa ríkari þörf fyrir áhættuminni eignir. Og í Bandaríkjunum hefur lítið ræst úr væntingum um að holskefla fjármagns í peningamarkaðssjóðum flæði í hlutabréf. „Staðreyndin er sú að lausafé keppir aðallega við lausafé,“ var haft eftir einum viðmælanda í umfjöllun WSJ, en þáttarstjórnendur koma inn á þetta í umræðum um ládeyðuna á hlutabréfamarkaði.
- Fjallað er um fyrrnefndan lista yfir arðbærustu fyrirtækin en einnig er birtur óformlegri listi um mesta rekstrartapið í íslensku atvinnulífi í fyrra.
- Þá er einnig fjallað um uppfært verðmat á Nova, vanmetna innviði og hátt hlutfall endurkaupa á markaðinum.
Syndis sér „óplægðan akur“ í netöryggi á Norðurlöndum
Hvaða erindi eiga íslenskar netöryggislausnir við Skandinavíu? Tekjur fyrirtækja sem starfa á sviði netöryggis hafa vaxið nokkuð kröftuglega á síðustu árum og nokkur þeirra sækja nú inn á markaði á Norðurlöndunum. Fremst í flokki er Syndis, sem er hluti af samstæðu Skyggnis, og við spurðum forstjórann hvernig útrásinni væri háttað.
Hagfræðiskörungar snertu á gjaldmiðlamálum Íslands
Gita Gopinath, sem gegndi stöðu aðstoðarframkvæmdastjóra hjá Alþjóðagjaldeyrissjóðnum árin 2022-2025, var gestur í nýjasta hlaðvarpsþætti Tyler Cowen, sem er tiltölulega þekktur hagfræðingur í Bandaríkjunum og einn af höfundum bloggsíðunnar Marginal Revolution, sem hefur verið eitt vinsælasta hagfræðibloggið um langt skeið.
Ísland bar á góma þegar Gopinath, sem er sérfræðingur á sviði gjaldmiðlamála, var innt eftir afstöðu sinni til evrunnar.
Matorka vill sækja 2 milljarða til að stækka bleikjueldið: „Enginn hörgull á eftirspurn“
Matorka, eldisfyrirtækið sem sérhæfir sig í bleikjueldi, vinnur að því að sækja um 15 milljónir evra, sem jafngildir ríflega 2 milljörðum króna, til að fjármagna áframhaldandi uppbyggingu á starfseminni. Bjarni K. Þorvarðarson, stjórnarformaður og stærsti hluthafinn eftir fjárhagslega endurskipulagningu, segir Matorku hafa svigrúm til að vaxa mjög hratt á næstu árum og að markmiðið sé, meðal annars, að finna hluthafa sem starfa í eldisgeiranum.
Þorsteinn Friðrik Halldórsson
„Þegar maður er búinn að vera hluti af vegferðinni í þennan tíma – átta ár – þá sér maður tækifærin, skilur þau og getur metið áhættuna. Þess vegna þá tel ég að bleikjueldi á Íslandi eigi framtíðina fyrir sér,“ segir Bjarni, spurður hvers vegna hann hafi ákveðið að halda áfram að fjárfesta í Matorku og eignast svo stóran hlut eftir áföllin.
Kafli úr nýrri bók um fjárfestingar: Gervigreind sem tæki
Arnbjörn Ingimundarson er framkvæmdastjóri fjárfestingafélagsins Gnitanes, sem var með bókfærðar eignir upp á ríflega 10 milljarða króna í lok síðasta árs. Stór hluti af eignasafninu eru óskráðar innlendar eignir en einnig fjárfestir félagið í skráðum verðbréfum, og þá aðallega á erlendum mörkuðum.
Arnbjörn hefur fengist við fjárfestingar og hlutabréfagreiningar allan sinn feril, og hann gaf nýlega út bók, Hlutabréf: Val, greining og stýring, sem fjallar um það hvernig nálgast má fjárfestingar í hlutabréfum með skipulegum hætti. Bókin er á rafrænu formi og ókeypis, og með leyfi höfundar er hér birt brot úr einum kafla, sem er sömuleiðis opið öllum lesendum.
