Stórir evrópskir fjárfestar sem sérhæfa sig í lánaafurðum segja að íslensku viðskiptabankarnir hafi nægilega stórt lánasafn til að framkvæma tilbúna verðbréfun (SRT) með aðkomu erlendra fjárfesta. Notkun á SRT, sem gerir bönkum kleift að draga úr áhættu í lánasafninu og minnka eiginfjárbindingu, hefur vaxið verulega á undanförnum árum og breiðst út til fleiri ríkja og smærri banka.
„Á hverjum nýjum markaði hefst þetta með einum banka. Það þarf eina stofnun sem er tilbúin að segja „Við ætlum að gera þetta“ jafnvel þó að allir aðrir bíði til að sjá hvernig spilist úr þessu,“ segir Frank Benhamou, forstöðumaður SRT hjá Cheyne Capital í London, sem er sérhæfður lánveitandi, í samtali við Hluthafann.
Eftir innleiðingu á Evrópureglum um verðbréfun seint á síðasta ári geta íslensku bankarnir dregið úr eiginfjárbindingu með nýjum hætti. Regluverkið greiðir götuna fyrir svokallaða tilbúna verðbréfun (e. synthetic risk transfer, SRT), sem er samkomulag þar sem banki greiðir ákveðið gjald til fjárfesta, sem skuldbinda sig á móti til þess að ábyrgjast útlánatöp – að minnsta kosti upp að vissu marki – í afmörkuðum hluta af lánasafninu.
