Hluthafinn hefur tekið stakkaskiptum á síðustu vikum. Fyrsti áfanginn var Registur, sem einfaldar til muna leit að upplýsingum um íslensk fyrirtæki og endurspeglast það í meiri notkun en við höfðum bundið vonir við.
Næsti áfangi sem kláraðist í byrjun vikunnar voru markaðsupplýsingar með tengingu við Nasdaq en þeir sem lesa fréttabréf þetta í tölvu geta séð að forsíða Hluthafans er gjörbreytt. Forsíðan er hönnuð þannig að lesandi átti sig umsvifalaust á því hvað sé efst á baugi í viðskiptalífinu þegar hann opnar síðuna.
Þriðji þátturinn, sem tvinnar þetta allt saman og verður tekinn í gagnið á morgun, snýst um viðskiptafréttirnar sjálfar, en í krafti þeirra gagnainnviða sem Hluthafinn hefur byggt upp á síðustu vikum hefur afkastagetan, þ.e.a.s. getan til að bæði finna og vinna fréttir, aukist stórkostlega. Það mun ekki fara fram hjá lesendum sem heimsækja forsíðu Hluthafans á næstu dögum.
Umbreyting Hluthafans á sér langan aðdraganda þótt hún hafi ekki tekið á sig mynd fyrr en á allra síðustu vikum. Þetta er hugmynd um rekstrarlíkan sem hefur gerjast í sjö ár. Hún er innblásin af fyrirmyndum erlendis eins og norrænu fjölmiðlasamsteypunni Schibsted og meira að segja af innlendum feilsporum (man einhver eftir Markaðurinn.is, sem var tilraun Fréttablaðsins til að ryðja sér til rúms með markaðsupplýsingar árið 2019 en rann út í sandinn?)
