Nú er aðgangur að upplýsingum svo greiður að flöskuhálsinn liggur ekki í að nálgast þær heldur í að vinna úr þeim, og þar hafa stór mállíkön breytt meiru á fáum árum en nokkuð annað tól sem ég hef notað. Gervigreind gefur þó ekki forskot í sjálfu sér, enda hafa allir aðgang að sömu tækni og hún flýtir fyrir öllum jafnt.
Fyrir fjárfesti sem hefur vel skilgreint fjárfestingarferli getur gervigreindin aftur á móti aukið afköst gríðarlega og gert verklag mögulegt sem án hennar væri of tímafrekt til að vera raunhæft. Sjálfur er ég farinn að beita gervigreindinni á öllum stigum fjárfestingarferlisins og má t.d. nefna:
Hraðlestur. Að fara í gegnum langt skjal, ársskýrslu eða uppgjörsupptöku, og draga fram það helsta sem skiptir máli. Það er gott að halda sér í æfingu með því að lesa slíkt efni yfir sjálfur, en maður nær ekki fara yfir nándar nærri jafnmikið efni með gamla laginu. Með þessum hætti má finna það áhugaverðasta sem verðskuldar nánari athygli fjárfestisins.
Andmælandinn. Að leggja fram eigin fjárfestingarhugmynd og biðja um sterkustu rökin gegn henni. Þetta vinnur beint gegn staðfestingarskekkjunni sem fjallað er um í kaflanum hér á undan og það er ekki endilega hlaupið að því að finna andmælanda með öðrum hætti. Sérstaklega einhvern sem er svona óþreytandi og móðgast ekki við skoðanaágreining.
Fylgst með stöðu eftir kaup. Eftir að keypt er í félagi getur gervigreind verið gagnleg til að halda utan um hvers vegna var fjárfest í því og svo fylgjast með eftir því sem nýjar upplýsingar berast hvort ástæður fyrir kaupunum haldi enn eða hvort tilefni sé til að selja bréfin.
Allt það helsta sem kemur fram í þessu riti hef ég látið gervigreind hafa sem samhengi fyrir mitt fjárfestingarferli og þannig get ég fengið staðlaðar greiningarskýrslur um fyrirtæki sem mér þykja áhugaverð algjörlega sniðnar að minni hugmyndafræði. Það væri óhugsandi fyrir mig að vinna með sama hætti án aðgangs að þessum tólum.
Mállíkön hafa átt það til að skila frá sér tölum sem líta rétt út en eru það ekki. Þess vegna þarf að passa vel upp á að allar helstu forsendur greiningar séu staðreyndar. Þetta vandamál hefur reyndar minnkað eftir því sem gæði líkananna hafa aukist og það hjálpar líka til að tengja líkön beint við gagnaveitur (ég nota t.d. Fiscal.ai) í stað þess að láta þau eingöngu leita á vefnum.
Að þessu gefnu er niðurstaðan sú að gervigreind færir vinnuna frá því að safna gögnum, reikna og lesa yfir í það að beita dómgreind. Tæknin breytist hratt og þess vegna er hér ekki fjallað um tiltekin tól eða aðferðir við að stýra þeim. Það sem stendur eftir er verkaskiptingin: vélin fer breitt yfir, fjárfestirinn ákveður hvað er spurt um og ber ábyrgð á svarinu.
Höfundur er Arnbjörn Ingimundarson, framkvæmdastjóri fjárfestingafélagsins Gnitanes
