Góðan daginn,
Eru gagnaverin tóm á meðan álverin iða af lífi? Slík eru hughrifin og sannarlega starfa margfalt fleiri í álverum en gagnaverum. En þegar rýnt er í það hversu mörg störf eru sköpuð með hverju megavatti breytist samanburðurinn gagnaverum í hag og munurinn er umtalsverður.
Annað: Nýlega fjölluðum við um 65 prósenta aukningu í útflutningstekjum vegna tölvuþjónustu sem skýrist af uppgangi í gagnaversiðnaði. Spurningin sem vaknaði í okkar huga var sú hversu mikið af þeim fjárfestingum sem gagnaver hafa ráðist í eiga eftir að brjótast fram í enn meiri útflutningstekjum á næstu misserum. Því er svarað í grófum dráttum í áhugaverðu viðtali við forstjóra atNorth.
Hérna er það helsta:
- Gagnaver skapa meiri atvinnu en almennt er talið, segir forstjóri atNorth
- Sameinaður sjóður væri með langstærsta hlutinn í Reitum og Högum
- Verðmiði HS Orku hækkaði um 10 milljarða eftir „besta rekstrarárið frá upphafi“
- Stofnuðu félag í Finnlandi eftir 168 prósenta vöxt á Íslandi
- Einn stærsti vogunarsjóður BNA skortselur Oculis
- Þinglok geta tafið uppbyggingu á 130 megavatta orkuvinnslu
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Gagnaver skapa meiri atvinnu en almennt er talið, segir forstjóri atNorth
Forstjóri atNorth segir að gagnaversiðnaðurinn á Íslandi skapi mun fleiri störf á hvert megavatt en ráða má af almennri umræðu og alls ekki færri störf en stóriðjufyrirtæki eins og álver. Störfum í atvinnugreininni fjölgar hratt og stór hluti af þeim miklu fjárfestingum sem gagnaversfyrirtæki hafa ráðist í allra síðustu misserin eiga eftir að birtast í auknum útflutningstekjum.
Sameinaður sjóður væri með langstærsta hlutinn í Reitum og Högum
Sameinaður lífeyrissjóður Gildis og Festu, sem hafa ákveðið að hefja samrunaviðræður, væri með meira en 20 prósenta eignarhlut í Reitum fasteignafélagi og Högum. Einnig myndi hlutdeildin aukast verulega í tveimur skráðum félögum miðað við stöðuna í dag.
Aukinn þungi í sameiningum lífeyrissjóða, sérstaklega þegar um ræðir stærstu sjóði landsins, hefur vakið spurningar um hver áhrifin verði á eignamarkaði. Á hlutabréfamarkaðinum geta afleiðingarnar verið þær að stórir, sameinaðir sjóðir hafi lítið svigrúm til að bæta við sig hlutabréfum og geti því aðeins hreyft sig með því að selja bréf.
Verðmiði HS Orku hækkaði um 10 milljarða eftir „besta rekstrarárið frá upphafi“
Eignarhaldsfélagið Jarðvarmi, sem heldur utan um eignarhlut fjórtán lífeyrissjóða í HS Orka, hækkaði verðmiðann á orkufyrirtækinu um tíu milljarða króna eftir góðan gang í rekstrinum.
Tekjur HS Orku námu 15,7 milljörðum króna í fyrra eftir 8 prósenta hækkun milli ára. Þá var EBITDA, rekstrarhagnaður fyrir afskriftir og fjármagnsliði, 6.500 milljónir samanborið við 5.493 milljónir árið 2024 og hefur aldrei verið meiri.
Þegar greint var frá niðurstöðunni í maí var haft eftir Tómasi Sigurðssyni, forstjóra HS Orku, að árið 2025 hefði verið besta rekstrarárið í sögu orkufyrirtækisins.
Stofnuðu félag í Finnlandi eftir 168 prósenta vöxt á Íslandi
Íslenskt félag sem sérhæfir sig í innflutningi og sölu á ljósleiðurum horfði upp á tekjurnar aukast um 168 prósent í fyrra en árið litaðist af stórfelldum fjárfestingum í uppbyggingu gagnavera hérlendis.
Lýsir ehf., sem var stofnað árið 2017, er umsvifamesta fyrirtækið í innflutningi og sölu á ljósleiðurum. Það var stofnað árið 2017 og hefur eitt af langtímamarkmiðum fyrirtæksins verið það að hasla sér völl á gagnaversmarkaðinum. Unndanfarin ár hefur sú vegferð skilað árangri.
Einn stærsti vogunarsjóður BNA skortselur Oculis
Sjóðastýringarfélag sem er eitt af þeim stærstu á sviði vogunarsjóða í Bandaríkjunum er með skortstöðu í líftæknifélaginu Oculis sem hefur hrunið í verði eftir vonbrigði í klínískum rannsóknum.
Fjármálaeftirlitið fékk tilkynningu í síðustu viku um 0,5 prósenta skortstöðu sem nemur hálfum milljarði króna miðað við markaðsvirði fyrirtækisins. Eftir birtingu fréttarinnar hefur staðan stækkað lítillega upp í 0,6 prósent.
Þinglok geta tafið uppbyggingu á 130 megavatta orkuvinnslu
Ef tillaga um flokkun þriggja virkjunarkosta í orkunýtingarflokk rammaáætlunar verður ekki afgreidd áður en Alþingi lýkur störfum getur hægst á uppbyggingu á uppsettu afli sem nemur alls 130 megavöttum.
Málið snýst um stjórnartillögu þar sem lagt er til að þrír virkjunarkostir verði flokkaðir í orkunýtingarflokk rammaáætlunar. Einn þessara virkjunarkosta varðar háhitakerfi Bolaöldu á Hellisheiði þar sem fyrirtækið Reykjavík Geothermal áformar að reisa hundrað megavatta jarðvarmavirkjun.
