Forstjóri atNorth segir að gagnaversiðnaðurinn á Íslandi skapi mun fleiri störf á hvert megavatt en ráða má af almennri umræðu og alls ekki færri störf en stóriðjufyrirtæki eins og álver. Störfum í atvinnugreininni fjölgar hratt og stór hluti af þeim miklu fjárfestingum sem gagnaversfyrirtæki hafa ráðist í allra síðustu misserin eiga eftir að birtast í auknum útflutningstekjum.
AtNorth, sem rekur þrjú gagnaver á Íslandi og brátt níu til viðbótar á Norðurlöndunum, er með 120 starfsmenn í innlendu gagnaverunum og notar alls 25 megavött til að knýja tölvubúnaðinn. Hvert megavatt skapar því fimm störf eins og sakir standa, en starfsmönnum fyrirtækisins fjölgar statt og stöðugt, og fjöldinn gæti verið kominn upp í 150 í lok árs.
Reikningsdæmið lítur öðruvísi út þegar rekstur álveranna á Íslandi er tekinn fyrir. Sem dæmi notar álverið í Straumsvík 390 megavött og starfa þar í kringum 380 manns, sem þýðir að hvert megavatt skilar einu starfi. Hlutfallið er lítillega betra í álverinu á Grundartanga – um 1,3 störf á hvert á megavatt – en langt undir því sem tíðkast í gagnaverunum.
„Munurinn er líka sá að 85 prósent af okkar starfsmönnum á Íslandi eru sérfræðimenntaðir – ýmist eftir háskólanám eða iðnnám – en þessu er yfirleitt öfugt farið í hefðbundinni stóriðju þar sem meirihluti starfa krefjast ekki sérfræðimenntunar, þó að þar séu búin til mörg góð og vellaunuð störf“ segir Eyjólfur Magnús Kristinsson, forstjóri atNorth.
„Mér finnst líklegt að almennt séu greidd hærri laun hjá gagnaversfyrirtækjunum þótt erfitt sé að fullyrða um það.“
