Góðan dag,
Í fréttabréfinu fjöllum við um stöðuna á byggingarmarkaðinum frá nokkrum hliðum, meðal annars með því að tala við stjórnendur byggingarfélaga, fá sjónarmið úr bankakerfinu og víðar.
„Ég á ekki hundrað óseldar íbúðir í búnka, en margir af kollegum mínum eru í þeirri stöðu, og það fjölgar í þeim hópi,“ segir einn stjórnandi í samtali við Hluthafann.
Það hvernig fjármagnskostnaður hleðst ofan á skuldir byggingarfélaga birtist líklega í nýjum tölum Seðlabankans um útlán innlánastofnana. Þær sýna útlán til atvinnugreinarinnar aukast um 15,8 milljarða í marsmánuði, sem er mesta aukningin í einum mánuði sem mælst hefur eins langt aftur og tölurnar ná, eða til ársbyrjunar 2013.
Við sögðum líka frá því fyrir stuttu að Kara Connect hefði orðið hlutskarpast í útboði Evrópusambandsins sem snerist um aðgang þrjátíu stofnana að stafrænu velferðartorgi næstu fjögur árin en samningurinn tryggir íslenska tæknifyrirtækinu tekjur upp á nokkur hundruð milljónir króna.
Til marks um aukna spennu í samskiptum Bandaríkjanna og ESB voru sett skýr skilyrði um að engin gögn yrðu vistuð vestanhafs. Íslenska tæknifyrirtækið þurfti því að skipta út fjórum bandarískum stuðningskerfum, sem það hafði notað fram að útboðinu, til að taka þátt.
Loks viljum við biðja lesendur að útkljá í eitt skipti fyrir öll hvernig best er að þýða „private credit fund“. Ríkisútvarpið notaði nýyrðið einkalánafyrirtæki í umfjöllun í mars, en kreditsjóður og sérhæfður lánasjóður eru orðin sem hafa verið notuð hingað til. Hér að neðan er ofureinföld könnun.
Í vikunni væntum við þess að birta framhaldsumfjöllun um áhrif væntanlegra Airbus-véla á íslenska ferðaþjónustu, skoða það hvernig sprotar eru að bregðast við töfum á endurgreiðslum vegna R&Þ og hegðunarmynstur á innlendum verðbréfamarkaði.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
„Ég á ekki hundrað óseldar íbúðir, en margir af kollegum mínum eru í þeirri stöðu“
Stjórnendur byggingarfélaga segja að eigið fé margra fyrirtækja í atvinnugreininni muni brenna upp ef ástandið á íbúðamarkaði batnar ekki í bráð. Eiginfjárstaða greinarinnar er sterk á heildina litið og eins eru góð skilyrði fyrir viðsnúningi þegar vextir lækka. En eftir bakslag í vaxtalækkunarferli Seðlabankans halda vextir áfram að hlaðast ofan á skuldir greinarinnar og það fjölgar í hópi þeirra sem sitja uppi með óseldar íbúðir.
Kara Connect landar samningum við 30 stofnanir ESB
Kara Connect varð hlutskarpast í útboði Evrópusambandsins sem snerist um aðgang þrjátíu stofnana að stafrænu velferðartorgi næstu fjögur árin en samningurinn tryggir íslenska tæknifyrirtækinu tekjur upp á nokkur hundruð milljónir króna.
„Þetta eru þrjátíu skrifstofur hjá Evrópusambandinu, meðal annars European Investment Bank, sem sameinast um útboð. Útboðið passaði vel að okkar þjónustu sem felur í sér að byggja velferðartorg: aðgang starfsmanna að velferðarþjónustu sérfræðinga,“ segir Þorbjörg Helga Vigfúsdóttir, stofnandi og framkvæmdastjóri Köru Connect, í samtali við Hluthafann.
