Alþjóðgjaldeyrissjóðurinn spáir því að bálkakeðjur verði snar þáttur í innviðum fjármálakerfisins í framtíðinni. Líklegasta niðurstaðan, segir AGS, er blandað líkan þar sem þar sem innviðir verðbréfaviðskipta færast yfir á bálkakeðjur en hefðbundnar fjármálastofnanir sjá áfram um áhættustýringu, regluhlítni og þess háttar.
Í þessari sviðsmynd er Myntkaup í góðri stöðu sem eini sem þjónustuveitandi sýndareigna starfsleyfi eftir innleiðingu á nýjum og hertum Evrópureglum í sumar.
Þorsteinn Friðrik Halldórsson
„Ef verðbréf eða aðrar eignir verða á bálkakeðjum eða stöðugleikamyntir verða í auknum mæli notaðar í viðskiptum, þá erum við með tæknilega innviði og sérfræðiþekkinguna sem þarf fyrir vörslu og aðra umsýslu. Við erum mjög bjartsýnir á þá þróun,“ segir Garðar Karl Ólafsson, stjórnarmaður og yfirmaður viðskiptaþróunar.
** ** **
Erlendir viðskiptamiðlar fjalla reglulega um það hversu miklu fyrirtæki verja (eða eyða) í gervigreind í hverjum mánuði. Skiptir sú þróun miklu máli fyrir gervigreindarrisana sem fjárfesta með fordæmalausum hætti í reiknigetu og binda vonir við mikla eftirspurn í framtíðinni.
Þorsteinn Friðrik Halldórsson
Hér hefur ekkert borið á slíkri umfjöllun, enda er engum tölum til að dreifa og ætla má að íslensk fyrirtæki séu komin skemmra á veg en stórfyrirtæki í Bandaríkjunum hvað varðar innleiðingu gervigreindarlausna. En það má hins vegar merkja talsverðan kipp í upplýsingatæknikostnaði Arion banka og Íslandsbanka, sem birtu uppgjör í vikunni.
** ** **
Háönn ferðaþjónustunnar byrjaði af heldur minni krafti en greiningardeild Íslandsbanka átti von á. Eins og fjallað var um í greiningu bankans í gær voru erlendir brottfararfarþegar á Keflavíkurflugfelli nærri 5% færri í júnímánuði síðastliðnum en í sama mánuði í fyrra samkvæmt mælingum Ferðamálastofu. Þá er kortavelta erlendra korta hér á landi nánast óbreytt þegar fyrri helmingur þessa árs er borinn saman við sama tíma í fyrra á sama gengi krónu.
Þorsteinn Friðrik Halldórsson
Þetta eru opinberu tölunar sem birtast með töf. Smásölusamstæðan Festi er hins vegar með puttann á púlsinum því á uppgjörsfundi í vikunni sagði Ásta Fjeldsted, forstjóri Festi, að tölur sem félagið hefur „úr farsímakerfum“ bentu til þess að ferðamönnum hefði fækkað um 10,8 prósent á öðrum ársfjórðungi.
Þetta endurspeglast líka í tölum Festi um erlenda kortaveltu hjá samstæðunni sem minnkaði um 11 prósent á sama fjórðungi á meðan innlenda kortaveltan jókst um 5 prósent. Breytingar á virðisaukaskatti og bensíngjöldum höfðu þó einnig áhrif.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Fleiri fréttir og umfjallanir
GRID margfaldaði tekjurnar með samningum við þekkt fyrirtæki í gervigreindarheiminum
Tæknifyrirtækið GRID, sem þróar lausnir til að tengja saman gervigreind og töflureikna, margfaldaði tekjurnar á svipstundu eftir að hafa náð að selja hugbúnaðarleyfi til stórra og þekktra fyrirtækja á sviði gervigreindar.
Hjálmar Gíslason, stofnandi GRID, fór yfir gengi fyrirtækisins á síðustu misserum í hlaðvarpinu Tæknital sem Advania heldur úti. Fyrirtækið var stofnað árið 2018 og gekk frá 20 milljóna dala fjármögnun tveimur árum síðar til þess að þróa lausnir tengdar töflureiknum.
Kvika setti 150 milljónir í Straum eftir taprekstur
Straumur greiðslumiðlun, sem er dótturfélag Kviku banka, tapaði meira en 100 milljónum króna í fyrra og var niðurstaðan talsvert verri en árið á undan.
Rekstur Straums hófst árið 2023 þegar Kvika keypti safn færsluhirðingarsamninga af Rapyd en safnið náði samanlagt yfir 25 prósent af íslenska markaðinum. Samkeppnin á markaðinum hefur þó harðnað til muna.
Gengisvarnir skilað töluverðri umframávöxtun síðustu ár
Þrátt fyrir nokkur gengisáföll frá ársbyrjun 2020 þá hefur borgað sig að verja erlendar hlutabréfastöður síðustu sex ár samkvæmt nýrri greiningu frá Kviku. Uppsöfnuð ávöxtun af vaxtamun gjaldeyrisvarna umfram veikingu krónunnar frá ársbyrjun 2020 er um 13,7 prósent í tilviki dollarans og 20,9 prósent í tilviki evrunnar.
Þrátt fyrir verulega rýmkun á heimildum til afleiðuviðskipta mátti ekki greina mikinn áhuga á meðal lífeyrissjóða, eins og fram kom í umfjöllun Hluthafans í desember 2023. Tölur Seðlabanka Íslands um skuldbindingar lífeyrissjóða vegna afleiðusamninga benda til þess að hið sama sé uppi á teningnum í dag.
Íslenska tæknifyrirtækið Godo selt fyrir 9,1 milljarð króna
Visit Group International greiddi 9,1 milljarð króna þegar sænska tæknifyrirtækið keypti Godo, sem sérhæfir sig í lausnum fyrir ferðaþjónustu, í fyrra.
Godo var stofnað árið 2013 af Sverri Steini Sverrissyni og Sveini Jakobi Pálssyni. Vandinn sem tæknilausnin leysir er í grófum dráttum sá, eins og því var lýst af Sverri í viðtali við FF7, að bókanir flæða til ferðaþjónustufyrirtækja úr öllum áttum – frá Booking, Expedia og Airbnb sem dæmi. Lausnin, Godo Property, tengist þessum kerfum og tekur á móti öllum upplýsingum um bókunina.
Höldur dregur saman seglin í samfélagsmálum eftir auknar álögur
Bílaleigan Höldur, sem fékk samfélagsverðlaun Þjóðmála í fyrra vegna stuðnings við íþrótta- og æskulýðsfélög, ætlar að draga úr framlögum samfélagsmála á næstu misserum til að bregðast við auknum álögum á atvinnugreinina og háu vaxtastigi.
Rekstrarumhverfið tók talsverðum breytingum í byrjun þessa árs þegar innleitt var kílómetragjald fyrir allar gerðir bíla, en samhliða því voru olíu- og bensíngjöld felld niður.
