Stanslaust streymi af gervislori (e. AI slop) hefur getið af sér neikvæðni í garð nýrrar tækni. En framkvæmdastjóri Öldu Music, sem er stærsti rétthafi íslenskrar tónlistar, segir að það sé röng leikáætlun að stinga höfðinu í sandinn á meðan gervigreindin fer eins og stormsveipur um tónlistarbransann. Með því að vinna með tækninni og setja henni skorður megi hins vegar skapa nýjan tekjustraum fyrir rétthafa og höfunda.
Þorsteinn Friðrik Halldórsson
Þá hefur forriturum á atvinnuleysisskrá fjölgað hraðar en almennt hefur tíðkast hjá öðrum hópum. Þróunin er nær einvörðungu bundin við þá forritara sem eru með grunnnámsgráðu en þeir sama hafa lokið framhaldsnámi virðast vera í heldur betri stöðu. Vinnumálastofnun tók saman sundurliðaðar tölur fyrir Hluthafann.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Í síðasta fréttabréfi fjölluðum við um afstöðu Samkeppniseftirlitsins til samruna sem varða stærstu lífeyrissjóðina og fáeinum dögum síðar var rakið í öðrum viðskiptamiðlum hvernig Gildi hefði selt sig niður fyrir 4 milljarða í Íslandsbanka og Arion banka.
Við ákváðum því að rýna betur í fleiri hluthafalista hjá skráðum félögum og varð myndin þá enn skýrari fyrir vikið, því markviss sala Gildis nær einnig til smásölufélaga sem starfa á mikilvægum samkeppnismarkaði og fasteignafélaga, þar sem samþjöppun eignarhalds lífeyrissjóða er hvað mest.
Fyrir áhugafólk um málfar og miðla:
Í fyrsta lagi höfum við tekið upp á því að nota „stjóri“ í stað orðsins „framkvæmdastjóri“ í fyrirsögnum svo að þær verði liprari og svo að hægt sé að koma meiri upplýsingum fyrir. Vandinn við íslenskar fyrirsagnir er að þær segja sjaldnast mikið um innihaldið.
Í öðru lagi tökum við af skarið og þýðum „AI slop“ sem gervislor en þannig fær frasinn „þetta er ekkert slor!“ nýtt hlutverk í samtímanum. Gervislor er sem sagt efni, hvort sem er tónlist, myndskeið eða annað, sem er framleitt af gervigreind og í svo lágum gæðaflokki að það er augljóst hvaðan það kemur.
Eigandinn setti 130 milljónir í Ísorku eftir þungan taprekstur
Egg ehf., sem er móðurfélag bílaumboðsins BL, keypti út smærri hluthafa í hleðslustöðvafyrirtækinu Ísorku í fyrra og fer eftirleiðis með full yfirráð. Samhliða því voru settar 130 milljónir í fyrirtækið í formi hlutafjár en Ísorka var rekin með miklu tapi í fyrra.
Ísorka hefur á sínum snærum víðtækt net hleðslustöðva fyrir rafbíla. Samkvæmt nýbirtum ársreikningi lækkuðu tekjur fyrirtækisins um 11 prósent milli ára, eða úr 637 milljónum niður í 568 milljónir. Afkoman versnaði einnig til muna en Ísorka tapaði 127 milljónum í fyrra í samanburði við 34 milljóna króna tap árið á undan.
DK Hugbúnaður á miklu skriði eftir yfirtöku Hollendinga
DK Hugbúnaður hefur tvöfaldað rekstrartekjurnar ásamt því að stórbæta framlegðina í rekstrinum á meðan hugbúnaðarfélagið hefur verið í eignarhaldi Hollendinga síðustu ár.
Samkvæmt nýbirtum ársreikningi námu rekstrartekjur DK Hugbúnaðar 3,5 milljörðum króna í fyrra eftir tæplega 11 prósenta vöxt. Og þegar litið er aftur til ársins 2020 ― en það ár velti fyrirtækið 1,7 milljörðum ― má sjá að tekjurnar hafa tvöfaldast á fimm árum.
Hollenska fyrirtækið Total Specific Solutions keypti DK Hugbúnað, sem er einkum þekkt fyrir bókhaldslausnir og fjárhagskerfi, árið 2020 fyrir 3,5 milljarða króna.
Samhliða kröftugum tekjuvexti hefur afkoman batnað til muna eftir yfirtökuna. Þannig fór EBIT-framlegð, þ.e. rekstrarhagnaður í hlutfalli við tekjur, úr 17 prósentum árið 2020 upp í ríflega 40 prósent árið 2023 og hefur haldist á því stigi.
Í fyrra nam rekstrarhagnaðurinn 1,4 milljörðum króna samanborið við tæpar 300 milljónir árið 2020, og var ákveðið að greiða út arð að fjárhæð 1.230 milljónir króna.
Annað íslenskt hugbúnaðarfyrirtæki, Five degrees, sem þjónustar bankakerfið og velti milljarði króna í fyrra, er hluti af sömu hollensku samstæðunni eftir samruna tveggja þarlendra fyrirtækja árið 2023.
Stjóri VÍ hagnaðist um fleiri hundruð milljónir
Björn Brynjúlfur Björnsson, framkvæmdastjóri Viðskiptaráðs, uppskar ríkulega í gegnum eignarhaldsfélag sem hélt utan um Moodup, sem var selt til Skyggnis í fyrra.
Samkvæmt nýbirtum ársreikningi STC ehf hagnaðist félagið um 385 milljónir króna á síðasta ári og vegur þar þyngst 300 milljóna söluhagnaður vegna hlutabréfa. Ofan á það bættust arðstekjur og gangvirðisbreytingar á öðrum eignum.
Með þessu jókst eigið fé fyrirtækisins úr rétt tæplega 100 milljónum í 415 milljónir króna, og var ákveðið að greiða út 100 milljónir króna í formi arðs.
Moodup hjálpar vinnustöðum að auka starfsánægju með mismunandi tegundum mælingum, svo sem púlsmælingum, sérsniðnum könnunum og stjórnendamötum. Björn Brynjúlfur stofnaði fyrirtækið árið 2021, þá starfandi sem ráðgjafi fyrir fyrirtæki og opinberar stofnanir við stefnumótun og rekstrarumbætur, þegar hann kom auga á gat á markaðnum varðandi starfsánægjumælingar á vinnustöðum.
„Eldri lausnir voru yfirleitt ítarlegar vinnustaðagreiningar sem voru tímafrekar bæði fyrir starfsfólk og stjórnendur. Þær voru kostnaðarsamar og nýttust takmarkað,“ sagði Björn Brynjúlfur í viðtali við Morgunblaðið árið 2024.
Moodup, sem var með tekjur upp á 116 milljónir árið 2024 og ríflega 50 prósenta hagnaðarhlutfall, var síðan keypt af Origo, sem er eitt af dótturfyrirtækjum Skyggnis, í byrjun síðasta árs.
Kaupin voru sögð fela í sér tækifæri til samþættingar við aðrar lausnir Origo í mannauðstækni, svo sem Kjarna mannauðskerfi og Rúnu launavakt. Origo gæti þannig boðið viðskiptavinum heildstæðari og öflugri lausnir sem ná til allra þátta mannauðsstjórnunar, allt frá ráðningum og frammistöðustjórnun til launa- og upplýsingakerfa.
Á meðal annarra fyrirtækja sem Björn Brynjúlfur hefur stofnað eru Frami, sem er vettvangur fyrir vefnámskeið, og Elvo, sem er stafrænt þjónustuborð fyrir fyrirtæki.
