Góðan dag,
Í þessu fréttabréfi er athygli lesenda vakin á þeim fréttum sem Hluthafinn hefur birt síðustu daga. Það er líka heilmikið í pípunum og töluverðar líkur á öðru fréttabréfi í þessari viku.
- Ef marka má Arctic Fish á Vestfjörðum mun áfram reyna á þolinmæði norsku eldisrisanna sem hafa varið tugum milljarða króna í uppbygginu sjókvíaeldis á Íslandi. Tap þeirra fjögurra fyrirtækja sem stunda laxeldi í sjó nam tæpum 15 milljörðum króna árið 2025 en þrátt fyrir það greiddu fyrirtækin nærri 3 milljarða króna í sértæka skatta. Stjórnvöld hafa brugðist við þessari stöðu með nýju frumvarpi en áfram verður skattbyrðin há í samanburði við helstu samkeppnislönd.
- Vangaveltur um áhrif gervigreindar á hugbúnaðarfyrirtæki hafa fengið mikið pláss á síðum erlendra viðskiptamiðla en við höfum ekki fengið innsýn í áhrifin á tæknifélög í eignasafni innlendra vísisjóða. Ekki fyrr en nú, því stofnandi Crowberry Capital greindi frá því hvernig grundvellinum var kippt undan einum sprota.
- Stjórnvöld vilja taka skref til að draga úr vægi verðtryggingar. Það gæti reynst snúið í framkvæmd enda er hún svo rótgróin að sextíu prósent Íslendinga yfir átján ára aldri eru með verðtryggðar ráðstöfunartekjur að sögn bankastjóra Arion banka.
- Er Gen Z- kynslóðin að drekka minna áfengi en fyrri kynslóðir vegna heilsuvitundar eða er það frekar verðbólguskeiðið sem hefur sett sitt mark á neysluvenjur ungs fólks? Hvað sem því líður hafa breyttar neysluvenjur haft áhrif á söluna á bjórunum frá Einstök.
- Óljóst er hversu stóra lánastöðu íslensku bankarnir hafa í innlendum gagnaverum og fyrirtækjum sem þar nota tæknibúnað til að knýja gervigreindarnotkun úti í heimi. En nú er ljóst að Landsbankinn hefur lánað inn í kaupphlaupið um reiknigetu.
Arctic Fish varar við stöðnun í sjókvíaeldi
Sjókvíaeldi mun áfram búa við þyngri skattbyrði en fyrirtæki í helstu samkeppnislöndum ef frumvarp um fiskeldi verður samþykkt í óbreyttri mynd. Arctic Fish á Vestfjörðum varar við því hversu lítið fjármagn mun standa eftir til að fjárfesta í vexti og að fjárfestingar færist til þeirra landa þar sem reksturinn er arðbærari.
„Ef skattkerfið verður ekki bætt verulega mun ekkert fjármagn standa eftir til fjárfestinga í vexti og þeirri stærðarhagkvæmni sem þarf til að dreifa föstum kostnaði. Afleiðingin verður sú að þróun laxeldis á Íslandi stöðvast og fjárfestingar færast í staðinn til arðbærari svæða erlendis.“
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Sproti í innlendu safni fékk að kenna á kröftum gervigreindar: „Níutíu prósent af þessu er núna hægt að gera með Claude“
Fyrirtæki í eignasafni Crowberry Capital, sem stýrir nokkrum innlendum vísisjóðum, varð fyrir barðinu á hraðri framþróun risamállíkana og stofnendur þess þurfa nú að hugsa viðskiptalíkanið upp á nýtt.
Sextíu prósent með verðtryggðar tekjur, segir bankastjóri Arion
Útbreiðsla verðtryggingar birtist í því að sextíu prósent Íslendinga yfir átján ára aldri eru með verðtryggðar ráðstöfunartekjur. Þetta kom fram í máli Benedikts Gíslasonar, bankastjóra Arion banka, á fjártækniviðburði SFF í gær.
Einstök segir minni drykkju Gen Z skýra samdrátt í bjórsölu
Alþjóðleg sala hjá Einstök, bjórvörumerkinu sem hefur notið vinsælda hér á landi, skrapp saman um 28 prósent milli ára árið 2025 en að mati fyrirtækisins er ein skýringin sú hvernig áfengisdrykkja er á undanhaldi hjá yngri kynslóðum. Þetta er orðið þekkt stef í umfjöllunum um framleiðendur áfengra drykkja úti í heimi en deilt er um það hvort þetta sé varanleg lífstílsbreyting eða tímabundið ástand vegna verðbólguskeiðsins.
Landsbankinn lánar inn í kapphlaupið um reiknigetu
WhiteFiber heitir fyrirtæki sem er skráð á bandaríska hlutabréfamarkaðinum og er með stórt fótspor hér á landi ef litið er til veltunnar. Það leigir rými undir vélbúnað frá tæknirisanum NVIDIA, svonefnd GPUs á ensku máli, í gagnaveri á Blönduósi og selur reiknigetuna sem er fólgin í búnaðinum í gegnum skýjaþjónustu.
