Bluebay Asset Management hefur verið stærsti erlendi fjárfestirinn á innlendum skuldabréfamarkaði á síðustu árum og í fréttabréfi sem Mark Dowding, fjárfestingastjóri hjá Bluebay, birti fyrir helgi er vikið að Íslandi.
Þar segir hann sjóðastýringarfyrirtækið vonglatt um íslensk skuldabréf vegna „mögulegrar samleitni við Evrópusambandið“ – með öðrum orðum að íslenskir vextir færist nær evrópskum vöxtum sem þýðir að skuldabréfaverðið hækkar – og nefnir atkvæðisgreiðsluna í þessu samhengi.
Þorsteinn Friðrik Halldórsson
„Gangi þetta í gegn þá sýnist okkur að Brussel og restin af Evrópusambandinu verði mjög viljug og áhugasöm um að fá landið inn í sambandið.“
Almennt hefur atkvæðisgreiðslan verið í aukahlutverki á skuldabréfamarkaði. Markaðsaðilar sem Hluthafinn ræddi við telja þó að „já“ geti haft skammtímaáhrif þar sem aukið innflæði frá erlendum fjárfestum hleypir lífi í markaðinn.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Lætur bókaskrif duga í bili eftir stóra sölu en útilokar ekki endurkomu
Eftir að hafa gengið frá annarri umfangsmikilli sölu á fyrirtæki sem hann byggði upp á grunni segir Reynir Finndal Grétarsson, stofnandi Creditinfo og eigandi fjárfestingafélagsins Infocapital, að hann láti sér nægja bókaskrif og ýmislegt annað dundur. Þó er ekki útilokað að hann fari aftur á fullt skrið í uppbyggingu fjármálainnviða.
„Þú verður að hafa forskot og þarna er þröngt svið þar sem ég og mitt fólk erum með þeim bestu í heiminum. Það að skapa störf og veltu í hagkerfinu – og í okkar tilfelli aðgang að lánsfé – er miklu áhugaverðara en að kaupa bréf í matvöruverslun þar sem ég hef ekkert fram að færa,“ segir Reynir í viðtali við Hluthafinn.
Vendingar í greiðslumiðlun: Kvika selur til Arion og Blikk á miklu skriði
Kvika tilkynnti í uppgjöri í síðustu viku að bankinn hefði sett dótturfélagið Straum, sem fæst við greiðslumiðlun, á sölu og væri komið í einkaviðræður þess efnis. Ármann Þorvaldsson, fráfarandi forstjóri Kviku, upplýsti síðan á fundinum sem var haldinn í kjölfarið að bankinn væri í einkaviðræðum við Arion banka og að söluvirðið væri „á annan milljarð“ króna.
Eftir kaup Arion banka á Straumi – gangi þau í gegn – verða allir stóru viðskiptabankarnir í sóknarhug á þessum markaði. En síðan er Blikk, sem svipar til hins vinsæla Swish í Svíþjóð, á miklu skriði.
Áfram risahalli hjá VBM, snarpur kippur í afkomu Verne og meðbyr netöryggissprota
Verðbréfamiðstöð Íslands, sem er að uppistöðu í eigu lífeyrissjóða og var stofnuð til höfuðs verðbréfamiðstöð Nasdaq, tapaði 296 milljónum króna í fyrra og bætist það ofan á 280 milljóna króna tap árið 2024.
Til að fylla í skarðið komu 300 milljónir frá eigendum í formi hlutafjár og er þá búið að setja vel á þriðja milljarð króna í uppbygginguna frá stofnun VBM 2015.
VBM náði hins vegar þeim áfanga í vor að gera aðildarsamninga við fjármálafyrirtækin T Plús og Kviku banka. Með samningunum hafa nú öll íslensk fjármálafyrirtæki og verðbréfafyrirtæki aðgang að VBM og geta átt viðskipti í gegnum kerfi félagsins.
Viðskiptakostnaður er um helmingi lægri hjá VBM en hjá keppinautinum, en það var haft eftir Einari Erni Davíðssyni, framkvæmdastjóra fyrirtækisins, í frétt Viðskiptablaðsins.
VBM, sem var með hreinar rekstrartekjur upp á 11 milljónir króna í fyrra, bindur líka vonir við samstarf við sænska fjárfestingabankann DNB Carnegie, opnar á þann möguleika að skrá íslensk fyrirtæki í Euronext-kauphöllina í Osló.
** ** **
Verne Global, eitt af þremur stóru gagnaversfyrirtækjunum hér á landi, var með tekjur upp á 135 milljónir Bandaríkjadala, jafnvirði 16,6 milljarða króna, í fyrra eftir 20 prósenta vöxt milli ára. Sama ár tók rekstarhagnaðurinn tók mikinn kipp – fór úr 15 milljónum USD upp í 27 milljónir.
Ekki verður betur séð en að heilmiklar tekjur kunni að vera í pípunum. Verne Global, sem rekur gagnaver á Reykjanesi og er í eigu franska sjóðastýringarrisans Ardian, tók nýlega í notkun 1.500 fermetra tengivirki sem mun skila allt að 240 MW uppsettu afli í lok árs. Er nú til skoðunar að ráðast í framkvæmdir sem fela í sér stækkun á gagnaverinu um 120 MW.
Þorsteinn Friðrik Halldórsson
Miklar fjárfestingar tengdar uppbyggingu gagnavera eru nú þegar farnar að sjást í útflutningstekjum. Undanfarna tólf mánuði hafa útflutningstekjur í flokknum tölvuþjónusta numið 112 milljörðum króna eftir meira en 65 prósenta aukningu frá tólf mánaða tímabilinu sem kom á undan.
Eyjólfur Magnús Kristinsson, forstjóri atNorth, sagði við Hluthafann í sumar að helmingurinn af fjárfestingum fyrirtækisins undanfarin misseri ætti eftir að koma fram og hann sagði geta ímyndað sér að svipað væri uppi á teningnum hjá hinum tveimur gagnaversfyrirtækjunum; Verne Global og Borealis Data Centers.
** ** **
Eftir því sem netöryggisógnir færast í aukana, og þá ekki síst vegna framþróunar gervigreindarlíkana, má greina vöxt og sóknarhug hjá þeim íslensku fyrirtækjum sem sérhæfa sig í netvörnum.
Eitt þeirra er Keystrike sem hefur þróað lausn sem sannreynir í rauntíma hverja einustu aðgerð, jafnvel lyklaborðssmelli, til að tryggja að einungis réttmætir notendur hafi aðgang að kerfum. Þannig má forðast alvarlegar afleiðingar netárása. Samkvæmt nýbirtum ársreikningi Keystrike námu rekstrartekjur fyrirtækisins 355 milljónum króna í fyrra eftir að hafa vaxið 56 prósent.
Annað er Defend Iceland, sem er tiltölulega nýtt af nálinni og nýtur stuðnings Guðmunds Fertram Sigurjónssonar, stofnanda Kerecis, sem kom inn í hluthafahópinn í fyrra. Netöryggisfyrirtækið bókfærði tekjur upp á 150 milljónir í fyrra eftir nærri tvöföldun frá fyrsta heila rekstrarárinu árið 2024 og hagnaðist um 86 milljónir.
Vara Defend Iceland er villuveiðigátt, byggir á samstarfi fyrirtækja og samfélags svokallaðra heiðarlegra hakkara, sem fá heimild til að leita að veikleikum í kerfum fyrirtækja og tilkynna þá. Þá var nýlega greint frá nýjung í vöruframboðinu, svokölluðum „gervigreindarhakkara“ sem er hannaður til að greina og sannreyna öryggisveikleika í tölvukerfum. Nýjungin kemur í kjölfarið á markaðssókn í Danmörku undir merkinu Defend Denmark.
