Happy Hydrate, bætiefnaduftið sem ætlað er til íblöndunar í vatn, hefur notið mikilla vinsælda á síðustu örfáu árum. En á meðan tekjurnar ruku upp úr öllu valdi fylgdi kostnaðurinn fast á eftir – og rúmlega það – og fyrirtækið safnaði skuldum hjá viðskiptabanka sínum. Fór að lokum svo að bankinn knúði fram sölu á vörumerkinu og lagernum, og ekkert var til skiptanna fyrir stofnendur sem höfðu afrekað það að hljóta tilnefningu fyrir eitt besta vörumerki landsins á sínu þriðja rekstrarári. Eflaust er einhver skrautleg saga þarna að baki og dýrkeyptar lexíur. En hverjir keyptu vörumerkið vinsæla? Það kemur fram í glænýrri frétt Hluthafans.
Við greinum einnig frá þeim áformum Treble Technologies að ganga frá 15 milljóna evra fjármögnun. Ekki verður betur séð en að meðbyrinn sé mikill, enda birti Financial Times ýtarlega fréttaskýringu fyrr í vikunni sem fjallaði um það hvernig stóru bandarísku tæknifyrirtækin væru að setja mikið púður í þróun spjallmenna (e. chatbots). Framtíðarsýnin er sú að skrifleg samskipti við gervigreind víki fyrir munnlegum samskiptum, og verði það raunin hlýtur Treble, sem er nú þegar með stærstu tæknifyrirtækin í viðskiptum, að vera í sterkri stöðu.
Þá er rétt að vekja athygli á viðtali sem Hluthafinn birti í byrjun vikunnar við stofnendur nýs félags, Verja Capital, sem er með nýjan vísisjóð í smíðum og mun einblína á fjárfestingar í viðnámsþróttartækni (e. Resilience tech) á Norðurslóðum.
Þorsteinn Friðrik Halldórsson
Áherslan á hugtök eins og þolgæði, öryggi og viðnámsþrótt hefur aukist til muna á mörgum sviðum. Versnandi öryggisumhverfi hefur knúið bandalagsríki NATO, þar á meðal Ísland, til að auka framlög til hernaðarmála og varnatengdra verkefna. Tilraunum til skemmdarverka á evrópskum innviðum hefur fjölgað verulega á síðustu árum, ógnin af netárásum fer vaxandi samhliða framþróun gervigreindar og fjölmörg ríki móta nú stefnu um gagnaöryggi og svokallað gervigreindarfullveldi. Svo mætti lengi áfram telja.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Arctic Therapeutics í viðræðum við stærstu lyfjafélög heims
Íslenska líftæknifélagið Arctic Therapeutics, sem þróar lyf við heilabilun og húðbólgusjúkdómum, er í viðræðum við sum að stærstu lyfjafyrirtækjum heims um mögulegt þróunarsamstarf.
Dr. Hákon Hákonarson, læknir og sérfræðingur í lungna- og genarannsóknum við Center of Applied Genomics (CAG) í Bandaríkjunum, stofnaði fyrirtækið árið 2015 eftir að hafa gert uppgötvun í leit að meðferð við arfgengri heilablæðingu.
Af fimm lyfjum í þróun er AT-001, sem verkar gegn heilabilun, komið lengst á veg í klínískum rannsóknum, eða nánar tiltekið í fasa III. Arctic Therapeutics gekk frá hlutafjáraukningu að fjárhæð 26,5 milljónir evra, sem var þá jafnvirði 4 milljarða króna, í lok árs 2024 til að fjármagna frekari rannsóknir.
Lyf við húðbólgusjúkdómum er í fasa II, en fyrirtækið hefur áætlað að markaðurinn fyrir lyf til meðferðar við þessum sjúkdómum verði rúmlega 100 milljarðar bandaríkjadala árið 2030.
„Horfur á komandi ári eru jákvæðar en félagið á í viðræðum við sum af stærstu lyfjafyrirtækjum heims um mögulegt þróunarsamstarf,“ segir í skýrslu stjórnar í nýbirtum ársreikningi.
„Þá hefur einnig komið fram töluverður áhugi á tveimur næstu lyfjum í þróunarpípu félagsins, sem staðfestir styrk og breidd lyfjaþróunarpípu þess.“
Framgangur lyfjaþróunar Arctic Therapeutics, sem var með rekstrarkostnað upp á 1,2 milljarða króna í fyrra, var í samræmi við áætlanir. Var öllum fyrirfram skilgreindum áföngum var náð.
Erlendu fjárfestarnir sem tóku þátt í fyrrnefndri fjármögnun voru meðal annars EIC fund, sem er fjárfestingasjóður í eigu Evrópusambandsins, danska fyrirtækið Sanos Group, sem sérhæfir sig í klínískum rannsóknum, svissnesku samtökin Cerebrum DAO, sem hafa það markmið að fjármagna rannsóknir á heilabilun, og bandaríski milljarðamæringurinn Jeffrey Lurie, sem er eigandi Philadelphia Eagles í NFL-deildinni.
Á meðal þeirra innlendu fjárfesta sem tóku þátt í hlutafjáraukningunni voru fjárfestingafélagið Kaldbakur, sem er að stórum hluta í eigu Þorsteins Más Baldvinssonar, Lífeyrissjóður Vestmannaeyja, Snæból, sem er í eigu Finns R. Stefánssonar og loks Pekron, sem er fjárfestingafélag Ágústs Guðmundssonar, stofnanda Bakkavarar.
Framtakssjóður fær pólitíska áhættu í fangið
Innviðaráðuneytið vill herða reglurnar um starfsemi ISNIC, sem sér um skráningar léna. Það sem skiptir eigandann mestu máli – framtakssjóð sem vill auka virði félagsins yfir tiltekinn líftíma – eru áform um að setja ákvæði sem stuðla að „eðlilegri verðagningu“ léna.
ISNIC er mjög arðbært fyrirtæki sem skilaði um 256 milljóna króna hagnaði af 555 milljóna króna veltu í fyrra. En frá því að fyrirtækið byrjaði að halda utan um lénin árið 1995 þá hækkaði árgjaldið ekki fyrr en árið 2021.
Þorsteinn Friðrik Halldórsson
Fram að því hafði það raunar lækkað nokkrum sinnum í krónum talið – síðast um 14 prósent árið 2014 – og þar af leiðandi lækkaði gjaldið umtalsvert að raunvirði um langt skeið.
Frá fyrstu verðhækkuninni árið 2021 hefur árgjaldið hækkað um 22 prósent á meðan almennt verðlag hefur hækkað um ríflega 40 prósent. Eftir hækkanirnar er árgjaldið, 7.680 krónur, á svipuðum slóðum og það var í krónum talið árið 2011.
Atlas gengur frá kaupum á stórum hlut í Air Atlanta
Bandaríska leiguflugfélagið Atlas Air Worldwide hefur formlega gengið frá kaupum tæplega helmingshlut í Air Atlanta og yfirtöku á öllum flugvélum samstæðunnar.
Tilkynnt var í lok maí að Atlas hefði náð samkomulagi um kaup á 49 prósentum í og að hópur lykilstjórnenda undir forystu forstjórans Baldvins M. Hermannssonar eignaðist 51 prósent.
Seljendur voru Hannes Hilmarsson, Geir Valur Ágústsson, Stefán Eyjólfsson og Helgi Hilmarsson, sem eignuðust Air Atlanta og tengd félög árið 2007.
Jafnframt eignast Atlas allt hlutaféð í Arctic Aircraft Leasing ehf. og Northern Lights Leasing ehf., sem fara með eignarhald nítján flugvéla samstæðunnar, og samhliða viðskiptunum var gerður langtímaleigusamningur um leigu flugvélanna til Air Atlanta.
Atlas, sem rekur stærsta flotann af Boeing 747 á heimsvísu, sendi frá sér tilkynningu í gær þar sem fram kom að kaupin væru nú frágengin. Samtals verða félögin með um eitt hundrað breiðþotur í rekstri.
Kaupverðið hefur ekki verið gefið upp, en í ársreikningi Haru Holding, sem hélt utan um eignarhlutina í öllum umræddum félögum, var eigið féð bókfært á 227 milljónir Bandaríkjadala, jafnvirði 28 milljarða króna, í lok árs 2025.
Baldvin M. Hermannsson forstjóri sagði í samtali við Vísi að innkoma Atlas í hluthafahópinn gæfi Air Atlanta „aukinn alþjóðlegan slagkraft“ og mögulega aðgengi að fleiri vélum. Þá sagði hann að höfuðstöðvar félagsins, sem er einnig með flugrekstrarleyfi á Möltu og starfstöðvar víða um heim, yrðu áfram á Íslandi.
