Á meðan lykilstjórnendur skráðra fyrirtækja hafa fengið aukin tækifæri til að bæta kjör sín þegar vel gengur, ýmist með kaupaukum eða nýtingu á kaupréttum, hefur umbunin fyrir það að sinna stjórnarstörfum mætt afgangi. Sem dæmi hækkuðu föst laun fyrir stjórnarformennsku hjá Festi um 9 prósent á tímabilinu 2019 til 2023 á meðan verðlag hækkaði 34 prósent.
Álíka staða er uppi hjá fasteignafélaginu Heimum, sem áður hét Reginn, tryggingafélaginu Sjóvá, smásölufélaginu Högum og jafnframt Kviku. Óvíða í Kauphöllinni hafa stjórnarlaun – að minnsta kosti þegar litið er til fastra launa formannsins – lækkað að raungildi frá því sem var fyrir heimsfaraldurinn.
Það sem skortir þó helst í umræðunni um stjórnarstörf, segir Bjarni K. Þorvarðarson, stjórnarformaður Eikar og stjórnarmaður í Símanum, er hvernig betur má tvinna saman hagsmuni stjórnarmanna og hluthafa.
„Það hefur verið mjög lítil umræða um stjórnarstörf, þ.e.a.s. hvort stjórnarmenn eigi að hafa hagsmuni af því að fyrirtækinu gangi vel í stað þess að það sé skrifað í lög að stjórnarlaun skulu veru föst upphæð, algjörlega ótengt því hvort rekstur fyrirtækisins gangi vel eða illa,“ segir hann.
