Góðan daginn,
Hérna er það sem við höfum skrifað síðustu daga.
- Framkvæmdastjóri Tölvuteks ræðir vaxtaráform og þau áhrif sem uppkaup gervigreindarrisa á vinnsluminni geta haft á raftækjaverð hérlendis
- Miklar fjárfestingar í gagnaverum breytast hratt í miklar útflutningstekjur
- Gervigreind mun ekki valda kerfisbundnu atvinnuleysi til lengri tíma litið, segir bankastjóri Seðlabankans í New York
- Stjórnvöld hafa spurst fyrir um aðgang að Mythos-líkaninu
- Bakslag í innlendri framleiðslu á kollageni
- Stjórnvöld vilja ekki girða fyrir hjónaband frændsystkina eins og Noregur og Svíþjóð
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
„Erum vel í stakk búin til að stækka“
Hafþór Helgason, framkvæmdastjóri Tölvuteks, eignaðist aftur hlut í fyrirtækinu sem hann stofnaði árið 2006 þegar hann tók nýlega þátt í kaupum á Tölvuteki ásamt öðrum lykilstjórnendum og eigendum Eldjárn Capital.
Hann segir helstu vaxtartækifærin felast í aukinni sölu heimilistækjua og meiri umsvifum á fyrirtækjamarkaði, og fer jafnframt yfir það hvernig uppkaup gervigreindarrisa á vinnsluminni getur haft mikil áhrif á verð á margskonar tækjabúnaði hér á landi.
Þá hefur hækkandi olíuverð einnig haft áhrif og til að bregðast við þessu ástandi hefur Tölvutek leitast við að skera út milliliði í Evrópu og fara beint til framleiðenda í Kína.
Fjárfestingar gagnavera breytast hratt í miklar tekjur
Miklar fjárfestingar í gagnaverum á síðasta ári, sem höfðu veruleg áhrif á viðskiptahalla Íslands við útlönd í fyrra, hafa á skömmum tíma byrjað að skila umtalsverðum tekjum.
„Helstu gagnaverafyrirtækin hér á landi hafa, heyrist mér, öll áhuga á því að auka umsvif sín verulega enda er almennt búist við örum vexti í geiranum á heimsvísu,“ segir Jón Bjarki Bentsson, aðalhagfræðingur Íslandsbanka.
Gervigreind muni ekki valda kerfisbundnu atvinnuleysi til lengri tíma litið
John C. Williams, bankastjóri Seðlabankans í New York, hefur ekki trú á því að innleiðing gervigreindarlausna í atvinnulífinu valdi kerfisbundnu atvinnuleysi til lengri tíma litið. Þetta kom fram í erindi Williams á ráðstefnu á vegum Seðlabanka Íslands í síðustu viku.
Stjórnvöld hafa spurst fyrir Mythos
Íslensk stjórnvöld hafa kannað möguleikann á því að fá aðgang að Mythos, gervigreindarlíkaninu frá tæknirisanum Anthropic sem er ekki enn komið í almenna dreifingu og er sagt búa yfir sérlegum öflugum eiginleikum á sviði netöryggis.
Einungis ríkisstofnanir og valin tæknifyrirtæki og fjármálastofnanir í Bandaríkjunum, alls 50 aðilar, hafa haft aðgang að líkaninu hingað til en Anthropic greindi í vikunni frá því að 150 aðilar í 15 löndum fengju aðgang á næstunni.
Þeirra á meðal er Evrópska netöryggisstofnunin ENISA en Evrópusambandið hefur leitast við að fá aðgang að líkaninu allt frá því í apríl þegar Anthropic greindi frá því að Mythos væri sérlega öflugt í því að finna netöryggisveikleika.
