Flugmiðaverð Icelandair hafa að meðaltali aukist um 10 prósent á þessu ári og endurspegla tölurnar bata í tekjumyndun flugfélagsins að sögn hlutabréfagreinanda. Á kostnaðarhliðinni verður afdrifaríkt hvort eignarhald Icelandair í Möltufélaginu verði einvörðungu notað sem tæki til að styrkja samningsstöðuna gagnvart stéttarfélögum eða til að knýja fram raunverulega hagræðingu.
Fjallað var um Icelandair í nýjasta þætti Uppgjörsins. Alexander Jensen Hjálmarsson frá greiningarfélaginu AKKUR vakti athygli á nýjum farþegatölum sem Icelandair hafði birt fyrr í vikunni.
„Kostnaðurinn hefur oft verið vandamál hjá Icelandair en undanfarið myndi ég segja að tekjumyndunin hafi verið meira vandamál. Við sjáum að það hefur heldur betur breyst og alla mánuði á þessu ári hafa meðalverðin verið að aukast töluvert.“
