Skagi er verulega vanmetin samkvæmt verðmati AKKUR en fjallað er um fjármálasamstæðuna í nýjasta þætti Uppgjörsins. Alexander Jensen Hjálmarsson frá greiningarfélaginu AKKUR vakti athygli á nýrri frumskýrslu fyrir Skaga þar sem fjármálasamstæðan var verðmetin á 27,7 krónur á hlut, eða 56 prósentum yfir markaðsgenginu í dag.
Tryggingafélagið VÍS stendur meira og minna undir verðmatsgenginu, en hin dótturfélög samstæðunnar; sjóðastýringarfélagið Íslensk verðbréf og fjárfestingabankinn Fossar, eru metin með varfærnum hætti.
„Það má segja að það séu tækifæri til framtíðar, þ.e.a.s. ef fjárfestar hafa trú á því að þessi félög munu búa til meira virði,“ sagði Alexander. Auðvelt sé að færa rök fyrir því að VÍS eigi eitt og sér að vera metið á 25 krónur á hlut en til samanburðar er markaðsgengi samstæðunnar tæpar 18 krónur í dag.
