Magnús Árnason, eigandi Markía, vill breyta því hvernig íslensk fyrirtæki nálgast markaðsmál sem eru víðast hvar í ólestri að hans sögn. Skortur á innviðum á þessu sviði leiðir til þess að áherslurnar breytast mjög eftir því sem markaðsstjórar koma og fara, og á sama tíma gengur viðskiptamódelið hjá auglýsingastofum út á það að selja meira og meira á hærra verði. Með tilkomu gervigreindar má hins vegar eiga von á uppstokkun.
Í markaðsmálum er Magnús öllum hnútum kunnugur eftir að hafa verið framkvæmdastjóri stafrænnar þróunar og markaðsmála hjá Nova, framkvæmdastjóri vöruþróunar hjá hugbúnaðarfyrirtækinu Oz og alþjóðavörumerkjastjóri hjá LazyTown/Turner Broadcasting.
Og með víðtæka reynslu sem markaðsráðgjafi fyrir innlend og erlend fyrirtæki af ólíkum toga dregur hann upp heldur dökka mynd af því hvernig íslensk fyrirtæki haga sínum málum upp til hópa.
„Ég hef séð undir húddið mjög víða og staðreyndin er sú að sölu- og markaðsmál eru almennt í ólestri,“ segir Magnús.
„Markaðsmálin hafa hingað til verið ótæknivædd og agalaus – hálfgerður risnukortabransi sem leiðir af sér ótrúlega sóun. Það er nánast óþekkt á Íslandi að fyrirtæki séu með skilvirka sölutrekt, eða viðhaldi viðskiptamannakerfi (e. CRM) með þeim hætti sem þekkist erlendis. Sama á má segja um rannsóknargögn og auglýsingamál.“
