Góðan dag,
Góðar tíu ára horfur í ferðaþjónustu
Verður ferðaþjónustan áfram einn af einn af helstu drifkröftum hagvaxtar – og kannski framleiðniaukningar í ofanálag – þvert á markmið atvinnustefnu stjórnvalda? Forstöðumaður leiðakerfis Icelandair segir að gera megi ráð fyrir verulegri fjölgun ferðamanna þegar nýjar Airbus-þotur opna markaði á vesturströnd Bandaríkjanna frá og með árinu 2029.
Þorsteinn Friðrik Halldórsson
Þetta rímar við málflutning forstjóra Isavia, eins og fjallað var um á þessum vettvangi. Einnig má setja ummælin í samhengi við það sem kom nýlega fram í máli forstjóra Bláa lónsins, sem telur að hægt sé að auka tekjur af ferðaþjónustu um 250 milljarða króna á næstu tíu árum með því einu að nýta framleiðsluþættina betur. Miðað við þessar spár er bjart framundan.
Sjóðirnir synda gegn straumnum þegar allir vilja kaupa bréf
Hlutverk lífeyrissjóða á verðbréfamarkaði skipar líklega stærri sess í umræðunni hér á landi en víðast hvar. Raunar má segja að það sé sérkenni markaðarins að innlendir lífeyrissjóðir eigi 40 prósent allra skráðra hlutabréfa á meðan þátttaka erlendra fjárfesta er töluvert minni en þekkist á öðrum mörkuðum.
Ýmsar vangaveltur geta sprottið út frá því og er vert að rifja upp viðtal Hluthafans við prófessor í lögfræði og fjármálum við Hamborgarháskóla og Oxford. Hann sagði umsvif lífeyrissjóðanna gera það að verkum að Kauphöllin virkaði sem þjóðhagslegt stjórntæki, þótt það væri ekki meðvituð hönnun. Sem dæmi væri hægt að virkja sterka stöðu lífeyrissjóða til að auka seljanleika á markaðinum.
Þorsteinn Friðrik Halldórsson
Þetta er hins vegar „flókið“ að biðja lífeyrissjóði að vera í senn langtímafjárfestar og virkir á markaði, eins og haft var eftir framkvæmdastjóra Birtu lífeyrissjóðs.
En nú er komið á hreint samkvæmt nýrri rannsókn sem við fjöllum um í dag að íslenskir fagfjárfestar, og þá sérstaklega lífeyrissjóðir, eru ólíklegri en almennir fjárfestar til að taka þátt í hjarðhegðun á hlutabréfamarkaði og hafa jafnvel mildandi áhrif á hlutabréfaverð þegar kaupþrýstingur er mikill.
Með öðrum orðum eru þeir sveiflujafnandi en það er hins vegar ekki ljóst hvort þeir stundi nægilega tíð viðskipti til að það hafi mikla þýðingu eins og staðan er í dag.
Besta þýðingin á „private credit fund“ liggur fyrir
Hluthafinn bað lesendur um að velja bestu þýðinguna á „private credit fund“. Orðin sem höfðu verið í notkun voru kreditsjóður og sérhæfður lánasjóður, og nýlega birtist nýyrðið einkalánafyrirtæki í umfjöllun Ríkisútvarpsins. Það var rík ástæða til að útkljá þetta í eitt skipti fyrir öll.
Niðurstöðurnar voru afgerandi. Sérhæfður lánasjóður fékk 53 prósent atkvæða og verður það notað framvegis í umfjöllunum Hluthafans. Næst kom einkalánasjóður með 25 prósent atkvæða og loks kreditsjóður með 15 prósent.
Á meðan atkvæðagreiðslunni stóð bárust einnig þrjár nýjar tillögur. Ein þeirra var framtakslánasjóður sem vísar til þess að sérhæfðu lánin eru hin hliðin á sama peningnum þegar óskráð atvinnufyrirtæki fjármagna sig utan bankakerfisins. Önnur tillaga var stuðningssjóður.
Loks stakk einn lesandi upp á nýyrðinu fjárfestabrunnur. Hluthafanum varð þá hugsað til Háfrónsku, sem er sérútbúin útgáfa af íslensku þar sem öllum mögulegum tökuorðum hefur verið skipt út fyrir alíslensk nýyrði.
Þessi brjálæðislega áhersla á málhreinsun hefur heltekið líf sérvitrings í Belgíu, sem hefur smíðað þúsundir íslenskra nýyrða í frítíma sínum. Mörg þeirra eru líka ágætlega smíðuð, eða er ekki ljóst að orðið gnæfingi hafi fagurfræðilega yfirburði þegar því er stillt upp við hlið orðsins gíraffi? Hvað með að segja nýgarn í staðinn fyrir nælon? En hvað sem því líður er nú komið á hreint að sérhæfðir lánasjóðir eru þýðingin sem meirihluti lesenda Hluthafans vill notast við.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Hér að ofan má líta auglýsingu frá hinu góða og mikilvæga innviðafyrirtæki ISNIC.
Staðan í viðskiptafréttamennsku á Íslandi er þessi:
Eftir að Morgunblaðið hætti með ViðskiptaMoggann er aðeins einn viðskiptamiðill með fleiri en einn á ritstjórn.
Við leitum að einum öðrum auglýsanda sem deilir því með okkur að vilja sjá meiri grósku en það.
Athugasemd:
Í nýlegri umfjöllun um stöðu byggingarfélaga vöktum við athygli á tölum Seðlabankans sem sýndu að útlán til atvinnugreinarinnar hefðu aukist um 15,8 milljarða í marsmánuði, sem er mesta aukningin í einum mánuði sem mælst hefur eins langt aftur og tölurnar ná, eða til ársbyrjunar 2013.
Það gat varla endurspeglað aukinn útlánavilja til greinarinnar og leiddum við líkur að því að hluti skýringarinnar væri vaxtakostnaðurinn sem hleðst ofan á skuldir byggingarfélaga.
Hin raunverulega skýring birtist hins vegar í glærum sem fylgdu með uppgjöri Landsbankans í síðustu viku þar sem fram kom að bankinn hefði endurflokkað lán til fasteignafélaga að fjárhæð 29 milljarðar króna sem útlán til byggingarstarfsemi. Áhrifin á heildarútlán voru því engin.
