Góðan dag,
- Það eru ekki nema tíu mánuðir frá því að tæknilausnin frá íslenska sprotanum GreenFish fór í loftið. Getur verið að í þessu kornunga fyrirtæki megi finna kröftugri tekjuvöxt en víðast hvar í íslenska nýsköpunargeiranum? Engar tölur geta staðfest það enn sem komið er, en við fengum smjörþefinn af því hvernig útgerðir um allan heim slást um að innleiða lausnina á undan keppinautum sínum. Og byggt á því kæmi Hluthafanum ekki á óvart ef risasjóðir á sviði vísisfjárfestinga kæmu til sögunnar á einhverjum tímapunkti.
- Hluthafinn hefur beðið eftir því að íslenskt fyrirtæki nefni gervigreind í sömu andrá og uppsagnir, enda þekkt stef í Bandaríkjunum og víðar. Loksins var hægt að skrifa þessa frétt þegar Íslandsbanki sagði aukna nýtingu á gervigreind kalla á breytta nálgun um leið og bankinn tilkynnti að stöðugildum myndi fækka um 50 á þessu ári.
Formaður Samtaka starfsmanna fjármálafyrirtækja gefur lítið fyrir skýringar Íslandsbanka og rekur þær fremur til þess hvernig eignarhaldið á bankanum hefur breyst. En það er ljóst að gervigreindin er að setja sitt mark á atvinnuhorfur í fjármálakerfinu og að Íslandsbanki talar meira um þessi mál – að minnsta kosti út á við – en hinir bankarnir. - Frá 2013 hefur sífellt stærri hluti auglýsingafjár runnið til erlendra miðla sem voru komnir með 51 prósents hlutdeild árið 2024. Þetta gömu saga og ný, og raunar er hálfpartinn orðið leiðigjarnt að fjalla um undanhald íslenskra miðla, sem virðist engan endi ætla að taka.
Eða hvað? Síminn, fullur eldmóðs eftir góðan gang í auglýsingasölu, telur að hægt sé að snúa þessari þróun við. - Eins og venjulega þegar fjölmiðlar fjalla um fjármál Reykjavíkurborgar er Hluthafinn engu nær, enda er öllum mögulegum tölum varpað fram til að draga upp ólíkar myndir af stöðunni. Til einföldunar horfum við aðeins á eina tölu og hér að neðan má sjá myndrit með samanburði við önnur stór sveitarfélög.
- Í fréttabréfinu á mánudaginn báðum við lesendur að velja hinu réttu þýðingu á „private credit fund“ en því miður komst könnunin ekki til skila með tölvupósti. Við þurfum því aðeins stærra úrtak áður en við birtum niðurstöðurnar.
Kreditsjóður, sérhæfður lánasjóður eða einkalánasjóður? Þú getur kosið um það hér. Við fengum líka eitt nýyrði og eru þau ævinlega vel þegin. Næst ætlum við hins vegar að nota eitthvað sem er aðeins fágaðra en Google Forms.
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Útgerðir um allan heim slást um gervigreindarlausn frá íslenskum sprota
Íslenska tæknifyrirtækið GreenFish hefur fundið fyrir stórauknum áhuga frá erlendum sjávarútvegsfyrirtækjum eftir að átökin í Miðausturlöndum smituðust í olíuverð og þrýstu upp kostnaði við veiðar. Áhuginn var heilmikill fyrir og nú standa útgerðir í biðröð eftir að láta smíða fyrir sig gervigreindarlíkan.
Hér að ofan má líta auglýsingu frá hinu góða og mikilvæga innviðafyrirtæki ISNIC.
Staðan í viðskiptafréttamennsku á Íslandi er þessi:
Eftir að Morgunblaðið hætti með ViðskiptaMoggann er aðeins einn viðskiptamiðill með fleiri en einn á ritstjórn.
Við leitum að einum öðrum auglýsanda sem deilir því með okkur að vilja sjá meiri grósku en það.
Fyrsta uppsögnin með vísan til gervigreindar en formaður SSF segir annað búa að baki
Formaður Samtaka starfsmanna fjármálafyrirtækja gefur lítið fyrir þær skýringar Íslandsbanka að notkun gervigreindar sé á meðal þess sem kalli á fækkun starfsfólks. Meginskýringin á bak við uppsagnir bankans í gær sé sú að hagsmunir starfsmanna hafi vikið fyrir hagsmunum fjárfesta eftir að bankinn komst alfarið í einkaeigu. Úti í heimi hefur gervigreindin þó sett sitt mark á atvinnuhorfur bankamanna á undanförnum mánuðum.
Síminn sér hlutdeild innlendra miðla aukast á ný eftir langt samdráttarskeið
Síminn telur að hægt sé að endurheimta hluta af því innlenda auglýsingafé sem hefur runnið til erlendra miðla á síðustu árum og er þetta eitt af þeim tækifærum sem fjarskiptafélagið sér fólgið í kaupum á fjölmiðlum Sýnar.
Staða borgarinnar er ... allt í lagi?
Ef aðeins mætti velja eina kennitölu til að leggja mat á grunnrekstur sveitarfélags þá er erfitt að mæla gegn því að skoða veltufé frá rekstri og setja það í samhengi við rekstrartekjur. Það er góð ástæða fyrir því að þetta er notað sem viðmið í eftirliti með fjármálum sveitarfélaga.
Kennitalan segir til um það hversu miklir fjármunir eru að myndast í grunnrekstrinum og þar af leiðandi hversu miklu er hægt að ráðstafa í afborganir skulda eða fjárfestingar.
Borgin var sannarlega í afleitri stöðu árið 2022 eftir að hafa fjölgað starfsfólki mun hraðar en önnur sveitarfélög árin á undan og horft upp á launahlutfallið rjúka upp. Veltufé frá rekstri var orðið lítillega neikvætt, sem er alvarlegt mál.
Nú er það komið upp í 6,9 prósent af tekjum, sem er nokkuð undir markmið borgarinnar um 7,5 prósent en á sama tíma er hlutfallið á pari við það sem sést í rekstri annarra stórra sveitarfélaga.
