Yfirtaka eða strategískt samstarf? — Fjarskiptarisar nálgast tæknigeirann með ólíkum hætti

Eitt kaupir stafræna bókunarþjónustu, samþættir við aðrar vörur og stígur á bensíngjöfina í markaðssetningu. Hitt kaupir minnihluta í keppinautinum til að koma á strategísku samstarfi þar sem frumkvöðullinn ræður áfram för. Tvö fjarskiptafyrirtæki eru komin í samkeppni á stafrænum markaðstorgum en þau nálgast fjárfestingarnar með ólíkum hætti.

Nova kemur inn í eigendahóp Dineout með 20 prósenta hlut eins og tilkynnt var í síðustu viku og tekur sæti í stjórn tæknifyrirtækisins. Samhliða því var undirritaður samningur um fjármögnun til þróunar á nýjum lausnum í „strategísku“ samstarfi við No­va. 

Dineout, sem var stofnað árið 2017, rekur borðabókunarkerfi fyrir veitingastaði og er ráðandi á þeim markaði. Auk þess eru 16 aðrar hugbúnaðarlausnir á snærum fyrirtækisins, svo sem kassakerfi og rafræn gjafabréf, sem saman eru sagðar mynda „stærsta markaðstorg landsins fyrir veitingaupplifanir“ og eru nýttar af 600 fyrirtækjum.

Teikna upp „nýja Mílu“ eftir útspil Nova

Það eru skiptar skoðanir á fjarskiptamarkaði um það hvaða hlutverki innviðafélagið, sem Nova ætlar að koma á fót, mun gegna. Sumir telja að það verði að mestu leyti bundið við Nova og sé því til þess fallið að draga betur fram virðið sem felst í fjarskiptainnviðunum fyrirtækisins. Aðrir túlka þetta

HluthafinnÞorsteinn Friðrik Halldórsson

Helsta samkeppnisógnin er Noona, sem er stærsta tímabókunarkerfi landsins og vinsælt hjá fyrirtækjum á borð við hjá hársnyrtistofur, tannlæknastofur og bifvélaverkstæði. Innlendur rekstur Noona var seldur til Símans í fyrra fyrir nærri 1.500 milljónir króna og afhentur í kringum áramótin eftir að hafa verið til meðferðar hjá Samkeppniseftirlitinu í töluverðan tíma.

Þó að bæði Nova og Síminn hafi fjárfest í tæknifyrirtækjum, sem sérhæfa sig í bókunum á þjónustu, þá eru ólíkar hugmyndir á bak við hvora fjárfestingu. Hjá Nova er markmiðið að styrkja vildarklúbbinn FyrirÞig, þar sem viðskiptavinum bjóðast sérkjör hjá veitingastöðum, afþreyingarfyrirtækjum og nú síðast á ferðamátum Hopp.

Vildarklúbburinn skapar fjarskiptafyrirtækinu engar beinar tekjur heldur sterka hvata fyrir neytendur að vera í viðskiptum og markmiðið er að gera hvatana enn sterkari. Frá sjónarhóli Nova er vildarklúbburinn lykillinn að því að auka enn frekar tekjur af svokölluðu flakkneti, og er þá einna helst átt við tekjur af gagnanotkun gegnum farsíma og netbúnað. Þetta er sú tekjulind sem gefur mestu framlegðina.