Brú lífeyrissjóður greiddi oftast allra lífeyrissjóða atkvæði gegn tillögum um starfskjör sem stjórnir skráðra fyrirtækja lögðu fram á síðustu aðalfundum. Samantekt Hluthafans sýnir að Brú, sem heldur utan um lífeyri starfsmanna sveitarfélaga, greiddi 7 sinnum atkvæði gegn tillögum sem vörðuðu starfskjarastefnu, kaupauka eða kauprétti.
Næst kemur Gildi lífeyrissjóður sem setti sig fjórum sinnum upp á móti slíkum tillögum og síðan Lífeyrissjóður starfsmanna ríkisins sem var mótfallinn í tvígang. Horft var fram hjá því þegar sjóðir sátu hjá við atkvæðagreiðslur.
„Kaupréttir eru ekki sjálfgefnir og ekki endilega besta leiðin til að tvinna saman hagsmuni hluthafa við hagsmuni stjórnenda,“ segir í svari Gildis við fyrirspurn Hluthafans. Bæði Gildi og Brú áttu þátt í því að fella tillögu stjórnar fasteignafélagsins Heima, sem áður hét Reginn, um heimild til að gera kaupréttarsamninga við lykilstjórnendur.
