Reksturinn hjá Arctic Adventures og Kynnisferðum, sem eiga í viðræðum um mögulegan samruna, batnaði þóknokkuð á síðasta ári. Eftir 22 prósenta tekjuvöxt í fyrra yrði sameinað fyrirtæki eitt stærsta ferðaþjónustufyrirtæki landsins með samanlagðar tekjur upp á nærri 27 milljarða.
Sömuleiðis batnaði rekstrarhagnaður beggja félaga töluvert og nemur hann samanlagt 5 milljörðum króna. Þannig fór EBITDA-framlegð, sem mælir hlutfall rekstrarhagnaðar af tekjum, úr tæplega 16 prósentum og upp í tæplega 19 prósent á árinu, og eru þá ótalin samlegðaráhrifin sem eigendur fyrirtækjanna gera ráð fyrir að ná fram.
Tilkynnt var um viðræðurnar seint á síðasta ári og er nú enn verið að framkvæma áreiðanleikakönnun sem endanleg ákvörðun verður reist á. Gangi samruninn eftir er ráðgert að sameinað fyrirtæki verði skráð á hlutabréfamarkað þegar búið er að ná fram fyrrnefndum samlegðaráhrifum.
Áður hafði komið fram í fjölmiðlum að fjárfestingafélagið Stoðir, sem er stærsti hluthafinn með ríflega 40 prósenta hlut, hefði uppfært verðmatið á ferðaþjónustufélaginu um 19 prósent samhliða aukinni arðsemi og tekjuvexti. Eignarhlutur Stoða er nú bókfærður á 7,7 milljarða króna, sem þýðir að Arctic Adventures er í heild sinni metið á meira en 18 milljarða.
Í ársreikningi Arctic Adventures var þess getið að fall flugfélagsins Play hefði sett sitt mark á síðasta fjórðung ársins.
„Fyrstu níu mánuðir ársins voru hagfelldir í rekstri félagsins en fall flugfélagsins Play, sem leiddi til samdráttar í komu ferðamanna, hafði áhrif á afkomu síðasta ársfjórðungs til hins verra,“ sagði í skýrslu stjórnar.
Þorsteinn Friðrik Halldórsson
Samstæðan rekur fleiri vinsæla áfangastaði, þar á meðal Into the Glacier í Langjökli, Lava Tunnel í Raufarhólshelli, Hvalasafnið á Granda og Óbyggðasetrið. Þá rekur samstæðan þrjú hótel með alls um 131 herbergi sem staðsett eru á Kirkjubæjarklaustri, í Öræfum og á Hellissandi.
Kynnisferðir, sem starfa undir merkjum Icelandia, eru með vörumerki á borð við Reykjavik Excursions, Flybus, Icelandic Mountain Guides og Dive.is. Aukningu í rekstrarhagnaði á síðasta ári mátti meðal annars rekja til áherslu á tækniframfarir og sjálfvirknivæðingu að sögn framkvæmdastjóra fyrirtækisins.
Bæði félög juku tekjur sínar með yfirtökum á síðasta ári. Kynnisferðir gengu frá kaupum á dagsferðahluta Hópbíla með kaupum á Reykjavík Sightseeing og Gray Line Iceland en á móti var bílaleigureksturinn í dótturfélaginu Bílaleiga Kynnisferða seldur út úr félaginu. Arctic Adventures eignaðist náttúruperluna Fjaðrárgljúfur og félagið Happy Campers, sem leigir út fullbúna ferðabíla.
