Fjárfestingarýni stjórnvalda, sem er ætlað að ganga úr skugga um að einstakar erlendar fjárfestingar á afmörkuðum sviðum leiði ekki af sér öryggisógn, hefur í för með sér kostnað upp á 40 milljónir króna á ári ef frumvarp þess efnis verður samþykkt.
Atvinnuvegaráðuneyti birti í gær áform um að setja lög um rýni á fjárfestingum erlendra aðila en stefnt er að því að leggja frumvarpið fram á næsta haustþingi. ugtakið „rýni“ vísar til greiningar og mats á því hvort viðskiptaráðstafanir, sem tryggja erlendum aðilum eignaraðild, veruleg áhrif eða yfirráð yfir atvinnufyrirtækjum hér á landi, ógni þjóðaröryggi eða allsherjarreglu.
Ráðuneytið segir vinnu við frumvarpið taka mið af alþjóðlegri þróun á þessu sviði en flest ríki á Evrópska efnahagssvæðinu (EES) og aðildarríki Efnahags- og framfarastofnunarinnar (OECD) hafa á síðustu árum sett löggjöf sambærilega þeirri sem lögð verður til með frumvarpinu. Útfærslurnar hafa þó verið mismunandi.
Áætlað er að bein fjárhagsáhrif af samþykkt frumvarpsins fyrir ríkið kunni árlega að nema 30 til 40 milljónum króna. Telur ráðuneytið að lögin geti skapað tvö ný stöðugildi og aðkeypt þjónusta kunni að vera nokkur.
Þá færir ráðuneytið rök fyrir því að „öflug löggjöf um fjárfestingarýni“ sé til þess fallin að auka traust á íslensku fjárfestingarumhverfi til hagsbóta fyrir atvinnulífið og samfélagið í heild.
„Fjárfestingarýni er þannig ekki ætlað að takmarka erlendar fjárfestingar almennt heldur er markmiðið að ganga úr skugga um að einstakar erlendar fjárfestingar á afmörkuðum sviðum leiði ekki af sér öryggisógn.“
Fréttin er hluti af stærra fréttabréfi Hluthafans sem er gefið út einu sinni í viku
