Lífeyrissjóður Vestmannaeyja er á meðal þeirra fjárfesta sem keyptu breytanleg skuldabréf, sem sjávarlíftæknifyrirtækið Unbroken gaf út í tengslum við risasamning í hjólreiðaheiminum.
Unbroken gerði samstarfssamning við hjólreiðaliðið Lidl-Trek, sem er „stærsti samningur af þessu tagi sem íslenskt vörumerki hefur gert“ að sögn framkvæmdastjóra fyrirtækisins. Samningurinn er til þriggja ára og metinn á vel á annan milljarð króna.
Í tengslum við samninginn hefur Zym Ice, móðurfélag Unbroken, gengið frá útgáfu á breytanlegu skuldabréfi fyrir 800 milljónir króna. Fjárfestarnir sem keyptu bréfin eru IS HAF fjárfestingar, sem er í stýringu Íslandssjóða, Lífeyrissjóður Vestmannaeyja og aðrir einkafjárfestar.
Þorsteinn Friðrik Halldórsson
Eftir sem áður er Útgerðarfélag Reykjavíkur stærsti hluthafinn með 40 prósent en félagið fjárfesti í Unbroken árið 2020. Runólfur Guðmundsson, framkvæmdarstjóri ÚR, er stjórnarformaður Zym Ice.
Unbroken framleiðir samnefnt fæðubótarefni í formi freyðitaflna, sem gefur hraða vöðvanæringu úr niðurbrotnu laxapróteini og er byggt á áralöngum rannsóknum og þróunarvinnu.
Notkunargildi Unbroken nær þvert yfir þær íþróttagreinar þar sem úthald skiptir mestu máli og nái fyrirtækið að byggja upp sterkt vörumerki í hjólreiðaheiminum kann það að verka sem stökkpallur yfir í aðrar greinar.
„Það sem við heyrum frá þeim læknum sem við höfum unnið með er að ef þú nærð fótfestu í hjólreiðaheiminum þá opnast dyr að öðrum íþróttum. Fótboltalið, sem dæmi, horfa til þess hvað hjólreiðafólk gerir til að bæta endurheimt og auka úthald,“ segir Steinar Kristjánsson, framkvæmdastjóri Unbroken, í viðtali við Hluthafann.
„Þess vegna þurfum við að nota þessa aðferðafræði: að búa til „authority“ í hjólreiðunum. Við erum strax farin að fá fyrirspurnir frá heimsklassahlaupurum sem keppa í Iron man og Triathalon. Þetta er farið að spyrjast út.“
