„Hlutabréf eru áhættufjárfesting en það þarf að koma því betur á framfæri – og á mannamáli – að heimilin ættu ef til vill að huga að aukinni dreifingu á sínum sparnaði. Það er ekki skynsamlegt til lengri tíma að einblína um of á innlánsreikninga,“ segir Arnór Gunnarsson, framkvæmdastjóri Íslenskra verðbréfa.
Innlán heimila hafa vaxið hratt og örugglega á síðustu árum á meðan hlutabréfaeign hefur gefið eftir. Stóra myndin er hins vegar sú, segir Arnór, að fjárfestingar í verðbréfum hafa almennt skilað hærri ávöxtun en hefðbundnir innlánsreikningar til lengri tíma litið.
Þá segist hann finna fyrir því að fyrirtæki leiti í auknum mæli til kreditsjóða, sem eru eitt af því sem aðgreinir Íslensk verðbréf frá flestum keppinautum, eftir því sem verðtryggð kjör fyrirtækjalána hjá bönkunum versna.
„Við horfum til frekari vaxtar í kreditafurðum enda teljum við að markaðurinn muni byggjast upp enn frekar á næstu árum.“
Íslenskur Ólympíufari fann kauptækifæri í golfinu
Leitarsjóðurinn Stamina ehf., sem Kári Steinn Karlsson Ólympíufari er í forsvari fyrir, hefur gengið frá kaupum á fyrirtæki sem rekur sérverslun með golfvörur og ferðaskrifstofu fyrir íslenska kylfinga. Leitarsjóður er heiti yfir sjóð, sem er stofnaður utan um frumkvöðul, sem oft er nefndur leitari í þessu samhengi.
„Ég held að þessi markaður eigi enn mikið inni. Það hefur verið gríðarlega mikil aukning í iðkendum íþróttarinnar á undanförnum árum. [...] Þá er þjóðin að eldast og á sama tíma endist fólki heilsan lengur og það hefur meira á milli handanna. Golfið höfðar þannig til stöðugt stækkandi markhóps sem hægt er að ná til,“ segir Kári Steinn.
Kerecis stóru skrefi nær landsdekkandi dreifingu í BNA
Með samningi við Cigna, eitt stærsta sjúkratryggingafyrirtæki Bandaríkjanna, hefur Kerecis tekið stórt skref í átt að því að ná greiðsluþátttöku allra tryggingafélaga Vestanhafs. Áætlanir íslenska heilsutæknifyrirtækisins gera ráð fyrir því að markmiðinu verði náð á næstu 18 mánuðum.
„Okkar samningar ná nú til um 200 milljóna Bandaríkjamanna og þá vantar 100 milljónir upp á,“ segir Guðmundur Fertram Sigurjónsson, stofnandi og forstjóri Kerecis, í samtali við Hluthafann.
Milljarðstap Lucinity hefur skroppið saman á síðustu mánuðum
Fjártæknifyrirtækið Lucinity, sem hefur þróað gervigreindarlausn til að uppræta peningaþvætti, hefur varið umtalsverðum fjármunum, mældum í milljörðum, á síðustu árum til að ryðja sér til rúms á markaði.
Guðmundur Kristjánsson, stofnandi og framkvæmdastjóri Lucinity, segir fyrirtækið hafa sýnt fram á sterkan árangur í fyrra og að því hafi tekist að draga verulega úr taprekstri á síðustu mánuðum.
Hagnaður Taktikal tók 100 milljóna króna kipp í fyrra
Tæknifyrirtækið Taktikal, sem sérhæfir sig meðal annars í lausnum fyrir rafrænar undirskriftir, uppskar ríkulega af nýrri lausn sem varð til þess að tekjur fyrirtækisins jukust um meira en 50 prósent í fyrra. Taktikal er í dag orðið mjög arðbært og sér fram á að geta sótt á erlenda markaði – þó varfærnislega – án þess að sækja meira fjármagn.
„Við þurfum ekki að taka inn aukið fjármagn heldur sjáum fram á að vaxa áfram með rekstrarfé. Það eru enn töluverð vaxtartækifæri á Íslandi og við höfum farið varlega í sókn á nýja markaði,“ segir Valur Thor Gunnarsson, framkvæmdastjóri og einn af stofnendunum Taktikal.
