Eik í útlánum, samtal við BNA um tolla og vel heppnuð gjaldtaka við náttúruperlu

Góðan daginn,

Hér er það sem Hluthafinn hefur fjallað um á síðustu dögum:

Fasteignafélagið Eik er að hefja útlánastarfsmi
Áfram samtal við BNA um tolla en Hæstaréttardómur skapaði „ákveðna óvissu“
Gjaldtaka við Fjaðrárgljúfur gefur vel af sér
Of snemmt að meta áhrif gervigreindar á stöðugildi Arion

Eik mun hefja útlánastarsemi

Á síðustu fimmtán árum eða svo hafa útlán í þróuðum ríkjum leitað frá bönkum til annarra aðila sem lúta ekki eins ströngu regluverki. Þetta birtist með margvíslegum hætti, svo sem í því hvernig lífeyrissjóðir hafa gert sig gildandi á íbúðalánamarkaði hér á landi, hvernig sérhæfðir lánasjóðir vaxa á sviði fyrirtækjalána og hvernig alls konar fyrirtæki sækja fram á markaðinum fyrir skammtímalán til neytenda.

Hluthafinn greindi í gær frá því að fasteignafélagið Eik hefði ákveðið að hefja útlánastarfsemi og það var hægt að gefa fréttinni aðeins meiri lit eftir að forstjórinn mætti í kjölfarið í Fjármálakastið.

Í grunninn er þessi ákvörðun reist á því að fasteignafélög séu í betri stöðu en aðrir til að meta lánshæfi bygginga, eins og forstjórinn komst að orði. Á sama tíma virðist þetta vera annað dæmi um regluverkshögnun (e. regulatory arbitrage) þar sem breytingar á regluverki banka beina tilteknum útlánum í farveg utan bankakerfisins.

Lesa frétt

Hluthafinn er í samstarfi við Internet á Íslandi hf. - ISNIC, skráningarstofu .is léna.

Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.

Finndu þitt .is lén

Stjórnvöld halda áfram samtali við BNA

Samtal stjórnvalda við fulltrúa Bandaríkjastjórnar um viðskiptakjör, sem hófst í fyrra eftir lagningu sérstakra gagnkvæmnitolla af hálfu Bandaríkjanna, hélt áfram á þessu ári samkvæmt svari frá utanríkisráðuneytinu og mun halda áfram þótt dómur Hæstaréttar þar í landi hafi skapað ákveðna óvissu í málinu.

Samkvæmt bandarískum hagtölum nam vöruútflutningur frá Íslandi til Bandaríkjanna rétt ríflega einum milljarði dala, jafnvirði 122 milljarða króna, árið 2025 en Ísland flutti inn bandarískar vörur fyrir 759 milljónir dala.

Enn er því umtalsverður vöruviðskiptahalli upp á fleiri tugi milljarða króna frá sjónarhóli Bandaríkjanna sem hafa í tíð sitjandi forseta lagt mikla áherslu á að draga úr halla á viðskiptum við önnur ríki.

Þessi viðleitni birtist einnig í því hvernig nýlegir viðskiptasamningar Bandaríkjanna hafa sumir hverjir miðað að því að hrifsa til sín fjárfestingar og framleiðslu (e. onshoring).

Þegar Sviss gerði samning um að lækka gagnkvæmnitolla úr 39 prósentum niður í 15 prósent í fyrra hétu svissnesk stórfyrirtæki því að fjárfesta fyrir 200 milljarða dala í Bandaríkjunum á næstu árum. Þessa viljayfirlýsing bættist við hefðbundna skilmála viðskiptasamninga, svo sem um markaðsaðgengi fyrir bandarískar landbúnaðarafurðir.

Í þessu samhengi þótti Hluthafanum athyglisvert þegar Alvotech, sem hefur knúið aukinn vöruútflutning til Bandaríkjanna á allra síðustu misserum, greindi í vikunni frá samstarfssamningi við Fujifilm Biotechnologies um framleiðslu á nokkrum lyfjahliðstæðum í Texas frá og með árinu 2027. Hvort það hafi einhverja vigt í samtali við Bandaríkin er hins vegar óljóst.

Lesa frétt

Gjaldtaka gefur vel af sér

Arctic Adventure hefur náð að skapa sér umtalsverðar tekjur af gjaldtöku við Fjaðrárgljúfur í Skaftárhreppi eftir að hafa tekið við rekstrinum í ársbyrjun 2025. Þar er gjaldtaka tiltölulega nýtt fyrirkomulag en Kerið í Grímsnesi, sem er einnig í eigu sama fyrirtæki, hefur um árabil sýnt hversu arðbært það getur verið.

Á sama tíma eru stór fasteignafélög ýmist byrjuð að „tekjuvæða“ bílastæði í þéttbýlinu eða að setja sig í stellingar eins og við fjölluðum nýlega um. Ef það væru til einhver samantekin gögn um heildarfjölda gjaldskyldra bílastæða í landinu mætti eflaust draga upp áhugavert myndrit.

Lesa frétt

Of snemmt að segja til um áhrif gervigreindar á stöðugildi hjá Arion banka

Stjórnendur Arion banka telja of snemmt að segja til um það hvenær hagnýting gervigreindar leiði til þess að stöðugildum innan bankans taki að fækka. Aðaláhersla bankans um þessar mundir felst í því að tryggja að starfsfólk hafi aðgang að nýjustu tækni og fái viðeigandi þjálfun.

Ummælin koma í kjölfar þess að Íslandsbanki tilkynnti um skipulagsbreytingar sem leiða til fækkunar á stöðugildum um 50 á þessu ári. Bankinn vísaði til þess að stafræn þróun og aukin nýting gervigreindar kölluðu á breytta nálgun í rekstri og þjónustu, og var þetta í fyrsta sinn sem skráð íslenskt fyrirtæki ber fyrir sig gervigreind – að minnsta kosti opinberlega – þegar tilkynnt er um uppsagnir.

Lesa frétt

Hér að ofan má líta auglýsingu frá hinu góða og mikilvæga innviðafyrirtæki ISNIC.

Staðan í viðskiptafréttamennsku á Íslandi er þessi:

Eftir að Morgunblaðið hætti með ViðskiptaMoggann er aðeins einn viðskiptamiðill með fleiri en einn á ritstjórn.

Við leitum að einum öðrum auglýsanda sem deilir því með okkur að vilja sjá meiri grósku en það.

Hafa samband