Íslenska hugbúnaðarfyrirtækið Lucinity átti um skeið erfitt með að fjármagna sig til lengri tíma en þessir erfiðleikar stöfuðu meðal annars af því hversu miklar væntingar voru bundnar við hraðan vöxt í kjölfar fjármögnunarlotu árið 2022. Hlutafjáraukningin nam tæplega 18 milljónum dala, jafnvirði meira en 2 milljarða króna, og verðmiðinn á fyrirtækinu var mjög hár.
Textinn er hluti af lengra viðtali við forstjóra Lucinity sem má nálgast hér:
Þorsteinn Friðrik Halldórsson
Blekið hafði varla þornað þegar innrás Rússa í Úkraínu hleypti fjármálamörkuðum í uppnám og hægði á öllu sölustarfi til muna. Almennt séð tekur líka sinn tíma að selja hugbúnað á regluvæddum markaði þar sem kaupendurnir lenda í miklum vandræðum ef þeir stíga feilspor.
„Þróun hugbúnaðarlausnar á við okkar, sem er ætluð fjármálafyrirtækjum til að uppfylla lögbundnar skyldur þeirra, tekur mjög langan tíma og kostar mikla fjármuni áður en tekjur ná að standa undir þeirri fjárfestingu,“ segir Daníel Pálmason,“ forstjóri Lucinity.
„Við vorum því að brenna nokkuð miklu fjármagni í þeirri þróunarvinnu og þurftum að fjármagna félagið með útgáfu breytanlegra skuldabréfa á árunum 2023 og 2024, þar sem ekki var áhugi á að taka verðmatið eins mikið niður og hefði þurft.“
Haustið 2025 var svo ráðist í fjárhagslega endurskipulagningu þar sem eigendur breytanlegra bréfa breyttu bréfunum að miklu leyti í hlutafé og samtímis bættist nýr danskur fjárfestir við hluthafahópinn.
Það var hinn danski Kristian Nygaard Johansen, sem hefur reynslu af uppbyggingu fjártæknifyrirtækja og hafði áður komist í kynni við Lucinity sem stjórnandi hjá Microsoft.
Það tók sinn toll að höggva á hnútinn í hluthafahópnum og koma fjármögnun félagsins á réttan kjöl. Á síðasta ári námu tekjur fyrirtækisins 2 milljónum Bandaríkjadala og voru þær nokkurn veginn á pari við árið 2024.
En með nýju hlutafé og stórum samningi við Oracle hefur fyrirtækið nú svigrúm til að fylgja eftir snarpri stefnubreytingu sem tekur mið af hraðri framþróun gervigreindar eins og rakið er í ofangreindu viðtali.
