Almennt má segja að tollastríð sé til þess fallið að draga úr efnahagsumsvifum í heimshagkerfinu og skerða lífskjör. Tilteknar atvinnugreinar, einkum þær sem fá skjól frá erlendri samkeppni, kunna þó að njóta góðs af aukinni tollvernd og jafnframt má finna dæmi um stöku fyrirtæki sem finna fyrir óbeinum, jákvæðum áhrifum af slíkri röskun á milliríkjaviðskiptum. Eitt þeirra er íslenska tæknifyrirtækið DTE.
Fyrirtækið hefur þróað búnað sem greinir efnasamsetningu fljótandi málma með leysigeislum en það auðveldar endurvinnslu áls svo um munar. Búnaðurinn kemur í staðinn fyrir handvirka sýnatöku sem getur, að því er kemur fram í fyrri viðtölum við stofnendur, tekið allt að tvo daga.
Fjallað var um DTE í bandaríska viðskiptatímaritinu Fortune í síðustu viku og var vikið að því hvernig betri endurvinnsla dregur úr þörfinni á innflutningi. Þetta orsakasamhengi, skrifar Fortune, hefur nú fengið aukið vægi í Bandaríkjunum þar sem forsetinn leitast við að minnka þrálátan viðskiptahalla og tryggja aðgengi að mikilvægum málmum.
„Í vissan hátt verka tollar sem hvati fyrir endurvinnsluiðnaðinn á Vesturlöndum og víðast hvar til að endurvinna ál, og þar af leiðandi styðja tollar óbeint við eftirspurn eftir okkar lausnum,“ sagði Jakob Ásmundsson, framkvæmdastjóri DTE, í samtali við Fortune.
DTE sótti 2,2 milljarða króna með hlutafjáraukningu árið 2023 en á meðal hluthafa eru Novelis, sem er stærsta endurvinnslufyrirtæki heims þegar kemur að áli, EIC Fund, sem er sjóður í eigu Evrópska nýsköpunarráðsins, og íslensku sjóðirnir Brunnur vaxtarsjóður og Eyrir Vöxtur.
