Daði Már Kristófersson, fjármála- og efnahagsráðherra, lýsti mikilvægi þess að einkafjármagn kæmi að uppbyggingu á orkutengdri starfsemi. Þetta kom fram í máli ráðherra á fundi sem Íslandssjóðir og Orkuklasinn stóðu fyrir í fyrradag og fjallaði um aðkomu fagfjárfesta að orkugeiranum.
Í þessu samhengi fjallaði ráðherra um áætlanir stjórnvalda um að flýta fyrir nauðsynlegri uppbyggingu orkukerfisins í heild sinni.
Þá fjallaði Jón Bjarki Bentsson, aðalhagfræðingur Íslandsbanka, um fjárfestingaþörf í orkuinnviðum. Hann benti á að eftirspurn eftir orku eins og hún birtist í spám – sérstaklega eftirspurn eftir hreinorku – gæti reynst íslenska hagkerfinu hagfelld ef rétt væri haldið á spöðunum.
Íslandssjóðir og Orkuklasinn vinna nú í sameiningu að því að koma á fót sjóðnum IS Afl, sem er ætlað að vera farvegur fyrir fjármagn frá innlendum lífeyrissjóðum til uppbyggingar í orkugeiranum. Fjármögnun sjóðsins stendur yfir og er áætlað að ljúka henni snemma á næsta ári. Sérhæft sjóðastýringateymi með þekkingu úr orkugeiranum mun stýra IS Afli ásamt hópi ráðgjafa úr sama geira.
