Daði Már Kristófersson fjármálaráðherra segir mikilvægt að Isavia endurheimti fyrri arðsemi og að óvissa um ferðalög yfir Atlantshafið minnki áður en ríkið setur meira hlutafé í Isavia til að fjármagna dýra og metnaðarfulla uppbyggingu Keflavíkurflugvallar á komandi árum. Þá gefur hann til kynna að ekki sé á dagskrá að hleypa erlendum fjárfestum inn í hluthafahópinn til að fjármagna uppbygginguna.
Síðustu tíu árin hefur samstæða Isavia fjárfest fyrir tæplega 105 milljarða króna og áætlanir næstu ára miða við frekari fjárfestingar upp á fleiri tugi milljarða. Árið í fyrra var stærsta fjárfestingaár í sögu félagsins en alls var fjárfest fyrir um 18 milljarða króna.
Kristján Þór Júlíusson, sem lét af störfum sem stjórnarformaður eftir síðasta aðalfund í mars, fjallaði í ávarpi sínu um þörf Isavia á hlutafé til að standa undir framkvæmdakostnaði.
