Pétur Sigurðsson hefur verið ráðinn forstöðumaður upplýsingatæknisviðs hjá Lífeyrissjóði verzlunarmanna. Pétur leiðir teymi ellefu hugbúnaðarsérfræðinga sem þróa og viðhalda hugbúnaði sjóðsins.
Á árunum 2008 – 2016 starfaði Pétur hjá Íslandsbanka m.a. sem hugbúnaðarsérfræðingur, vörustjóri netbanka og deildarstjóri Digital Channel Solutions.
Frá árinu 2016 hefur hann starfað í eigin rekstri og sinnt margvíslegum stafrænum verkefnum og ráðgjöf, meðal annars fyrir Valitor, Samgöngustofu og Stafrænt Ísland og Bláa Lónið.
Fráfarandi forstöðumaður UT sviðs Haraldur Arason verður áfram hjá sjóðnum en hann fagnar á næstunni 40 ára starfsafmæli hjá sjóðnum
Haft er eftir Guðmundi Þ. Þórhallssyni, framkvæmdastjóra LV, að Pétur komi inn í upplýsingatækniteymið til að styrkja innviði, öryggi og áreiðanleika kerfa.
„Reynsla hans mun jafnframt nýtast til að einfalda ferla, bæta þjónustu og aðgengi fyrir sjóðfélaga. Framundan eru metnaðarfull verkefni og við ætlum okkur að vera í fremstu röð stafrænnar þróunar sem skilar árangri í þágu sjóðfélaga,“ segir Guðmundur.
