Eftir fimm ár af verðbólgu yfir verðbólgumarkmiði hafa vaknað spurningar um það hvort laga þurfi markmiðið betur að íslensku efnahagslífi. Hvernig hefur verðbólgumarkmiðið þjónað íslenska hagkerfinu hingað til og hvaða afleiðingar hefði hærra markmið í för með sér? Hafsteinn Hauksson, aðalhagfræðingur Kviku, rekur söguna og sjónarmiðin sem búa þar að baki í samtali við Hluthafann.
Olivier Blanchard, fyrrverandi aðalhagfræðingur Alþjóðagjaldeyrissjóðsins, hefur kallað eftir hærri verðbólgumarkmiðum í 15 ár. Röksemdarfærslan er á þá leið að með því að hækka markmiðið úr 2 prósentum í 3 eða 4 prósent hafi seðlabankar meira svigrúm til að knýja fram neikvæða raunvexti þegar efnahagslífið verður fyrir áfalli.
„Sú röksemd gildir auðvitað ekki fyrir Ísland, enda hefur vandinn okkar yfirleitt verið of mikil verðbólga – ekki of lítil – og við höfum í raun aldrei lent á núllvaxtagólfinu,“ segir Hafsteinn.
„Hér á landi er röksemdin kannski frekar sú að vegna sérkenna íslenska hagkerfisins höfum við ítrekað þurft meiri sveigjanleika í aðlögun hlutfallslegra verða en önnur rík, og hærra verðbólgumarkmið veiti okkur þennan sveigjanleika án þess að Seðlabankinn þurfi að velja á milli þess að steypa hagkerfinu í samdrátt eða stefna trúverðugleikanum í tvísýnu á aðlögunarskeiðum.“
Lesa umfjöllun
Hluthafinn er í samstarfi við Internet á Íslandi hf. - ISNIC, skráningarstofu .is léna.
Ertu í fyrirtækjarekstri? Skráðu þitt .is lén og tengdu við tölvupóstinn þinn á einfaldan hátt.
Íslensk gagnaver í góðri stöðu á meðan örflöguskortur veldur usla
Miklar verðhækkanir á örflögum, sem smitast svo verðlagningu á flóknari tækjabúnaði, eru ekki takmarkandi fyrir íslensk gagnaver, segir framkvæmdastjóri Verne á Íslandi í samtali við Hluthafann.
Fyrirtæki á borð við Google og OpenAI soga til sín sífellt stærri hluta af heimsframleiðslu örflaga (e. memory chips) með stórfelldum uppkaupum á svokölluðum GPUs, sem hafa verið kölluð skjákort. Þau gegna því hlutverki að hraða reiknigetu og innihalda mikið magn af örflögum.
Lesa frétt
Útgáfan fór úr skorðum í síðustu viku vegna veikinda og biðjumst við velvirðingar á því, enda hefur markmiðið verið að birta umfjallanir í hverri viku. En nú er Hluthafinn hrokkinn aftur í gang og margt áhugavert efni er í vinnslu, svo sem um endurkaup á verðbréfamarkaði, jaðartekjur fasteignafélaga o.s.frv.
