Leitarsjóðurinn Stamina ehf., sem Kári Steinn Karlsson Ólympíufari er í forsvari fyrir, hefur gengið frá kaupum á fyrirtæki sem rekur sérverslun með golfvörur og ferðaskrifstofu fyrir íslenska kylfinga. Í samtali við Hluthafann segir hann golfið eiga mikið inni enda fari markhópurinn stækkandi.
„Ég stóð á tímamótum; hafði lengi verið launamaður í mikilli keyrslu, en þegar við hjónin eignuðumst tvíbura ákvað ég að fara í langt og gott fæðingarorlof, og segja upp á gamla vinnustaðnum. Ég fann að þetta var góður tímapunktur til að breyta til,“ segir Kári Steinn.
Leitarsjóður er heiti yfir sjóð, sem er stofnaður utan um frumkvöðul, sem oft er nefndur leitari í þessu samhengi. Eftir kaup á fyrirtæki tekur hann við sem framkvæmdastjóri og stýrir því í gegnum vöxt og umbreytingu þar til ákvörðun er tekin um að selja. Stamina ehf. er einn af þeim fimm leitarsjóðum sem eru á snærum sérhæfða framtakssjóðsins Leitar I, sem stýrt er af Leitar Capital Partners.
„Ég held að þessi markaður eigi enn mikið inni. Það hefur verið gríðarlega mikil aukning í iðkendum íþróttarinnar á undanförnum árum“
Kári Steinn lauk rekstrarverkfræðiprófi í Berkeley í Kaliforníu og er í þokkabót með tvær meistaragráður frá Háskólanum í Reykjavík í fjármálum og endurskoðun. Fram að þessum tímamótum hafði hann starfað sem fjármálastjóri hjá 66°Norður-samstæðunni, þar áður sem fjármálastjóri tæknifyrirtækisins OZ og sem rekstrarráðgjafi hjá KPMG.
Með mikla fjármálareynslu að baki þótti Kára Steini tímabært að taka næsta skref og leitast eftir framkvæmdastjórastöðu. Og það sem heillaði hann við leitarsjóði, sem eru tiltölulega nýtt fyrirbæri hér á landi, er það að leitarinn fær hlut í fyrirtækinu sem getur stækkað í hlutfalli við ávöxtun fjárfesta.
„Þetta er sérkennileg vegferð – hver og einn þarf að finna sína nálgun og sinn takt. Mín nálgun var mjög opin til að byrja með. Með reynslu af fjármálum og fyrirtækjaráðgjöf skilur maður hvernig hjólin snúast en ég hafði ekki sértæka reynslu af neinni tiltekinni atvinnugrein,“ segir Kári Steinn.
„En þar sem ég hafði verið fjármálastjóri hjá 66°Norður byrjaði ég að skoða smásölufyrirtæki og einnig er ég hrifinn af öllu sem viðkemur íþróttum, heilsu og hreyfingu.“
Farsælan íþróttaferil þarf vart að rekja en Kári Steinn keppti fyrir hönd Íslands í langhlaupum á stórmótum og fór á Ólympíuleikana í Lundúnum 2012. Hann hafði þó aldrei spilað golf – einungis fylgst með golfmótum í sjónvarpi – og þegar golfverslunarfyrirtækinu Helgi Einar Nonni brá fyrst fyrir í leitinni hugsaði hann með sér að þetta væri eitthvað sem hægt væri að skoða betur síðar.
Þorsteinn Friðrik Halldórsson
En það vildi svo til að viku seinna hafði annar eigandinn samband og var í söluhugleiðingum.
„Við tökum kaffibolla og hjólin byrjuðu að snúast. Þá kom betur í ljós að þetta er hörkufyrirtæki sem þeir hafa byggt upp og þeir hafa náð að skipa sér góðan sess á þessum markaði. Fyrir mig er líka mjög spennandi að demba sér í nýtt sport.“
Fyrirtækið Helgi Einar Nonni rekur golfverslunina Golfskálann, sem er sérverslun með golfvörur. Þar er að finna gott verslunarrými, æfingabás og boðið er upp á mælingar til að aðstoða kylfinga við að finna réttu kylfurnar.
Samhliða því rekur félagið ferðaskrifstofu sem sérhæfir sig í golfferðum til Spánar og fleiri landa, og í því er fólgin ákveðin sveiflujöfnun. Mest er um að vera í versluninni á sumrin og í kringum jólin, en ásókn í golfferðir er mest á vorin og haustin.
Helgi Einar Nonni velti tæplega 1,2 milljarði króna í fyrra og skilaði hagnaði upp á 142 milljónir. Fyrirtækið hefur vaxið nokkuð hratt á síðustu árum en sem dæmi nam veltan 592 milljónum árið 2021.
„Ég held að þessi markaður eigi enn mikið inni. Það hefur verið gríðarlega mikil aukning í iðkendum íþróttarinnar á undanförnum árum og rúmlega 26 þúsund aðilar voru skráðir í golfklúbba á Íslandi í lok síðasta árs. Þá eru ótaldir þeir fjölmörgu iðkendur sem ekki eru skráðir í golfklúbba en stunda golfið af kappi,“ segir Kári Steinn, sem er sjálfur byrjaður að stíga sín fyrstu skref sem iðkandi.
„Þá er þjóðin að eldast og á sama tíma endist fólki heilsan lengur og það hefur meira á milli handanna. Golfið höfðar þannig til stöðugt stækkandi markhóps sem hægt er að ná til, og svo er þetta bara frábært sport í sjálfu sér.“
Vertíðin er nú hafin og á það sérstaklega við um golfverslunina. Stærsta viðfangsefnið sem blasir við nýja framkvæmdastjóranum er að tryggja að reksturinn gangi smurt fyrir sig og að góðu þjónustustigi sé viðhaldið.
„Ég er ekki að fara að hræra í neinu til að byrja með, en með haustinu getur maður byrjað að skoða hvar tækifærin liggja og maður hefur nú þegar ákveðnar hugmyndir.“
