Magnús Berg Magnússon, stjórnarformaður Bergeyjar, segir að fasteignafélagið skoði nú tækifæri fyrir geymsluleigur á höfuðborgarsvæðinu og utan þess. Mikill vöxtur hefur sést í þessum geira í Bandaríkjunum og Bretlandi á meðan lítið hefur breyst á íslenska markaðinum. Þar til nýlega.
Fasteignafélagið hefur að undanförnu fært út kvíarnar með kaupum á Austurbæjarbíó fyrir 700 milljónir króna og skrifstofuhúsnæði að Digranesvegi í Kópavogi. Þar áður hafði Bergey keypt gömlu Mjólkurstöðina við Snorrabraut og nú spannar eignasafnið 13 þúsund fermetra af atvinnuhúsnæði á höfuðborgarsvæðinu.
