Mikilvægt er að koma þeim skilaboðum á framfæri við íslensk heimili að skoða fleiri kosti í sparnaði en innlánsreikninga þegar litið er til lengri tíma. Þetta segir Arnór Gunnarsson, framkvæmdastjóri Íslenskra verðbréfa, sem er dótturfélag fjármálasamstæðunnar Skaga.
„Við höfum séð innlán heimilanna vaxa gríðarlega hratt sem er mjög áhugaverð þróun. Það má spyrja sig hvers vegna heimilin velji að leggja svo mikla áherslu á innlán þegar bæði fræðin og sagan segja okkur að innlán gefi lægri ávöxtun til lengri tíma litið,“ segir Arnór. Þó verður að hafa í huga, bætir hann við, að innlán eru áhættuminni valkostur en flestir aðrir og skila því lægri ávöxtun í takt við það.
Skagi sér tækifæri fólgin í því að ná til almennra fjárfesta og þá einkum með krosssölu milli dótturfélaga, til að mynda að bjóða þeim einstaklingum sem eru í tryggingaviðskiptum við VÍS upp á sparnað í sjóðum hjá Íslenskum verðbréfum. Í tengslum við það hafa upphafsþóknanir af sjóðaviðskiptum verið felldar niður fyrir viðskiptavini VÍS.
Tækifærið sem Skagi sér á þessum markaði helgast af því að innlán heimila hafa vaxið hratt og örugglega á síðustu árum. Þau standa nú í nærri 1.800 milljónum króna og eru nálægt því að hafa tvöfaldast frá byrjun árs 2020.
Í síðustu Peningamálum var þessi vöxtur rakinn til samspils nokkurra þátta. Helst má nefna að heimilin virðast ekki hafa nýtt sparnaðinn sem safnaðist upp í kjölfar farsóttarinnar nema að litlu leyti til neysluútgjalda. Þá hafa laun hækkað nokkuð á tímabilinu og vaxtastigið verið hátt.
