Míla og Samkeppniseftirlitið hafa gert með sér nýja sátt sem felur það í sér það að skilyrði fyrri sáttar, sem fjarskiptafélagið hafi lýst sem mjög íþyngjandi, falla niður. Samhliða því féllst Míla á að greiða 200 milljónir króna í stjórnvaldssekt vegna tiltekinna samskipta við Símann.
„[Míla fær] aukið svigrúm til að keppa á jafnari grundvelli við aðra heildsöluaðila á fjarskiptamarkaði,“ segir í tilkynningu frá fjarskiptafélaginu.
Sáttin felur í sér endurskoðun á sátt frá árinu 2022, sem gerð var í kjölfar sölu Mílu til innviðasjóðs undir stjórn Ardian France SA. Við söluna árið 2022 voru eignatengsl milli Mílu og Símans rofin en samtímis gerður heildsölusamningur milli Mílu og Símans.
Samkvæmt sáttinni árið 2022 var Mílu bannað að stunda samkeppnishamlandi vöndlun og samtvinnun þjónustuþátta. Þá tryggðu skilyrðu í sáttinni jafnan aðgang að kerfum, þjónustu og upplýsingum frá Mílu.
Rannsókn Samkeppniseftirlitsins hefur leitt í ljós breytingar á stöðu Mílu á mörkuðum fyrir heimtaugar, þ.e. aðgangi að kopar- og ljósleiðaratengingum og markaði fyrir gagnaflutning um heimtaugar (bitastraum).
„Ljóst er að Míla er enn með sterka stöðu á landsvísu á þessum mörkuðum (landsdekkandi) og býr yfir breiðu þjónustuframboði á öðrum sviðum innviða fjarskipta,“ segir í tilkynningu frá eftirlitinu.
„Á hinn bóginn hafa aðrir keppinautar, einkum Ljósleiðarinn á sínum starfssvæðum (m.a. höfuðborgarsvæðinu), styrkt mjög stöðu sínu á liðnum árum og er nú með talsvert meiri hlutdeild þar í fjölda tenginga en Míla.“
Af þessum sökum hefur Samkeppniseftirlitið fallist á að skilyrði um aðgang að kerfum, upplýsingagjöf og bann við samtvinnun og vöndlun gildi ekki nema á þeim landssvæðum þar sem Míla hefur umtalsverðan markaðsstyrk.
Samhliða þessu viðurkenndi Míla að tiltekin samskipti við Símann, yfir afmarkað tímabil, hefðu getað haft áhrif á hvata Símans til að kaupa þjónustu frá samkeppnisaðilum Mílu umfram það sem leiddi af samningsbundinni kaupskyldu samkvæmt heildsölusamningi Mílu og Símans. Féllst Míla á að greiða 200 milljónir króna í stjórnvaldssekt vegna þessa.
