Rekstur Auðkennis, sem rekur rafræna auðkenningarþjónustu, hefur umbreyst frá því að ríkissjóður tók fyrirtækið yfir árið 2022. Tekjurnar hafa vaxið hratt en útgjöldin mun hraðar í takt við auknar lögbundnar kröfur á þessu sviði og fjárfestingar í tækniþróun.
Auðkenni var upphaflega stofnað árið 2000 og reksturinn gekk brösuglega framan af. Notkun rafrænna skilríkja komst ekki almennilega á skrið fyrr en árið 2015 þegar notkun slíkra skilríkja var nýtt við framkvæmd hinnar svokölluðu leiðréttingar.
Auðkenni var þá í eigu bankanna og Símans, en þegar rafrænu skilríki voru komin í almenna notkun lagði Katrín Jakobsdóttir, þáverandi forsætisráðherra, kapp á að koma þessum stafrænu innviðum í hendur ríkisins. Það gekk eftir árið 2021.
Skilaboðin til eigendanna voru skýr: Seljið eða ríkið smíðar sína eigin lausn. Bankarnir, sem þá voru að megninu til í eigu ríkisins, streittust ekki á móti og Síminn var því eini hluthafinn sem setti spurningamerki við söluverðið.
