Alvotech keypti þróunarstarfsemi sænska líftæknifyrirtækisins Xbrane Biopharma í mars fyrir 3,6 milljarða króna. Í viðtali við Hluthafann útskýrir Róbert Wessman, forstjóri og stjórnarformaður Alvotech, hugmyndina á bak við kaupin.
Hann nefnir að þróun á hliðstæðulyfi hefjist á frumulínunni svokölluðu, þar sem genum er komið fyrir í frumum til þess að þær framleiði það prótín sem hliðstæðan byggist á.
Þorsteinn Friðrik Halldórsson
„Þróun frumulínunnar tekur að jafnaði eitt ár – þó aðeins minna en ár í okkar tilfelli – og að því loknu tekur við það verkefni að þróa framleiðsluferlið. Við jukum verulega afköst í þróun á frumulínum fyrir um 2 árum síðan en til að efla enn frekar næstu skref þróunar hefðum við þurft að ráða á bilinu 100 til 150 manns í þá einingu á Íslandi,“ segir Róbert.
„Á þessu sviði er ekkert sem kemur í staðinn fyrir reynslu og okkur þótti því freistandi að taka yfir fyrirtæki sem telur um 50 starfsmenn, hefur starfað frá árinu 2010 og sérhæft sig í þeim þróunarfasa sem við vildum styrkja okkur í.“
Svíþjóð er jafnframt uppspretta flestra líftæknifyrirtækja á eftir Bandaríkjunum, sem þýðir að það er auðvelt að finna starfsfólk með reynslu. Róbert segir að Alvotech muni sennilega ráða 100 manns í Svíþjóð en jafnframt 100 manns á Íslandi til viðbótar við þau 400 sem fyrir eru í rannsóknum og þróun.
Með kaupunum eignast Alvotech allt lyfjahugvit Xbrane tengt fyrirhugaðri hliðstæðu við Cimzia, 2,5 milljarða dala lyfi sem er í samkeppni við Humira en hentar betur konum á barnseignaraldri. Alvotech stefnir að því að setja hliðstæðuna á markað á árinu 2028 og Róbert segist ekki vita til þess að nein önnur hliðstæða við Cimzia sé í þróun.
Var yfirtakan á Xbrane mjög sérstakt tilfelli eða má búast við fleiri sambærilegum yfirtökum þegar fram í sækir?
„Við höfum auðvitað skoðað fullt af tækifærum í geiranum og það er í sjálfu sér ekkert sem okkur vantar, strategískt séð, í starfsemina í dag. Við erum með framleiðslugetuna, sennilega besta þróunarteymið í geiranum og flest lyf í þróun, og það er ekki mikið þarna úti sem myndi bæta einhverju við,“ segir Róbert.
„Nema þá kannski eitthvað sem myndi einfalda „lógistíkina“ enda erum við að vaxa hratt með fjölgun lyfja á markaði og að selja lyf til 90 landa þegar að fram líða stundir. Við myndum kannski skoða það en bein yfirtaka á sambærilegu félagi held ég að sé ekki í kortunum í dag.“
