Innlend hugbúnaðarfyrirtæki þurfa að vera á tánum og móta stefnu sem tekur mið af þeim breytingum sem fylgja gervigreind. Þetta segir Hjálmar Gíslason, stofnandi og framkvæmdastjóri GRID, í viðtali um það sem býr að baki verðlækkunum hugbúnaðarfyrirtækja á erlendum hlutabréfamörkuðum og hvað það getur þýtt fyrir íslenskar hugbúnaðarlausnir.
Snörp verðlækkun skráðra hugbúnaðarfyrirtækja hefur verið uppnefnd „SaaSpocalypse“ í erlendum fréttamiðlum. Verðlækkunin helgast af því hvernig væntingar fjárfesta til þess hvaða áhrif gervigreind hefur á viðskiptalíkön hugbúnaðarfyrirtækja breyttust skyndilega.
Hlutabréfaverð Salesforce, sem selur vinsælasta viðskiptavinakerfi heims, er 30 prósentum lægra en það var um áramótin. Hið sama gildir um Adobe, sem selur margvísleg hönnunartól og hefur lækkað um 23 prósent á þessu ári. Sé horft á þróunina í víðara samhengi hefur vísitalan S&P North American Technology Software lækkað um 22 prósent á meðan S&P 500 vísitalan hefur hækkað lítillega.
Óvissa hefur vofað yfir hugbúnaðargeiranum allt frá því að ChatGPT kom fram á sjónarsviðið fyrir þremur árum, en þegar gervigreindarfyrirtækið Anthropic, sem þróar risamállíkanið Claude, kynnti nýlega fítusa sem hjálpa fyrirtækjum að sjálfvirknivæða verkferla fór uggur um fjárfesta. Um svipað leyti birtust uppgjör frá bandarískum hugbúnaðarfyrirtækjum sem voru undir væntingum.
Hjálmar segir að óvissan um áhrif á hugbúnaðarfyrirtæki sé tvíþætt. Annars vegar snúist hún um það hvort gervigreindarlausnir muni leysa fjölbreyttari verkefni í framtíðinni og því verði minni þörf fyrir sérsmíðaðan hugbúnað.
