Skráningu Alvotech á sænska hlutabréfamarkaðinn í maí var fylgt eftir með hlutafjárútboði þar sem fjörutíu nýir erlendir fjárfestar tóku þátt. Helmingur þátttakenda voru alþjóðlegir sjóðir, 40 prósent voru „lykilsjóðir“ á Norðurlöndunum en einungis tíu prósent komu frá íslenskum fagfjárfestum.
„Þótt félagið hafi ekki þurft peninginn þá held ég að þetta hafi verið vel þess virði. Ég reikna með að stór hluti af þessum fjárfestum sé kominn til að vera og muni líklega auka hlut sinn í félaginu,“ sagði Róbert Wessman, forstjóri og stjórnarformaður Alvotech, í viðtali við Hluthafann.
„Þetta eru sjóðir sem byrja á því að kaupa sig inn í félag og ef áætlanir þess standast kaupa þeir stærri hlut þegar fram líða stundir. Ég tel að það muni gerast.“
Viðleitni Alvotech til að fá sérhæfða fagfjárfesta í hluthafahópinn þarf að setja í samhengi við verðþróun fyrirtækisins í Kauphöllinni. Þrátt fyrir að félagið hafi nýlega hækkað afkomuspána fyrir þetta ár og stefni að því að ná 45 prósenta EBTDA-framlegð af 1,5 milljarða dala tekjum árið 2028, er verðlagning félagsins umtalsvert undir verðmati greinenda. Gengið stendur í ríflega 9 dölum á meðan greinendur verðleggja bréfin á bilinu 16 til 28 dali.
Þorsteinn Friðrik Halldórsson
Í viðtalinu var Róbert spurður hvernig honum þætti verðmyndun fyrirtækisins á íslenska hlutabréfamarkaðinum.
„Við kunnum að meta þann stuðning sem við höfum fundið á Íslandi. Það er hins vegar allt öðruvísi að setjast niður með fagfjárfestum, sem þekkja iðnaðinn og skilja starfsemina. Þetta er ekki einföld starfsemi – þróunarferlið, framleiðsluferlið og markaðssetningin – og maður hefur fullan skilning á því að þekkingin sé minni á Íslandi.“
Skortur á sérþekkingu í bland við smæð íslenska markaðarins þýðir, að sögn Róberts, að virði Alvotech endurspeglast ekki í markaðsgenginu.
„Íslenskir fjárfestar ná ekki endilega að bregðast við þegar góðar fréttir berast og það er jafnvel verið að eiga viðskipti sem byggjast á röngum upplýsingum eða sögusögnum. Þá finnst manni stundum að íslenski markaðurinn horfi skammt fram á veginn og þess vegna væri hollt fyrir félagið að fá inn fleiri fagfjárfesta, sem þekkja iðnaðinn betur.“
Í þessu samhengi nefnir hann að Alvotech sé stundum borið saman við hin tvö hávaxtarfélögin á markaði, Amaroq og Oculis, sem eru enn tekjulaus á meðan Alvotech velti hálfum milljarði dala í fyrra.
„Alvotech er ekki lengur „spekúlatívt“ heldur byrjað að skila gríðarlegum tekjum og hefur gert langtímasamninga við mörg af stærstu lyfjafyrirtækjum heims, sem hafa skuldbundið sig til að greiða allan rannsóknar- og þróunarkostnað lyfjanna okkar í skiptum fyrir réttinn til að markaðssetja þau,“ segir hann.
„Á árinu 2024, eftir að hliðstæða Humira var sett í sölu í bandaríkjunum, nam sala á því eina lyfi um 25 prósentum af heildarútflutningstekjum Íslendinga inn á stærsta markað í heimi.“
